Markaziy Amerikada joylashgan Gonduras hukumati 1,6 million tupdan ortiq koka (bargidan kokain olinadigan tropik buta)ni musodara qildi, deya xabar bermoqda Reuters.
Mamlakat vakillarining aytishicha, kokain ishlab chiqarish uchun ishlatiladigan o‘simliklar uch kunlik operatsiya natijasida topilgan. O‘simliklar qirg‘oq bo‘yidagi Kolon departamentining tog‘li hududlaridagi to‘rtta plantatsiyadan topilgan.
“Bu tarixiy musodara. Biz giyohvand moddalar savdosi bilan shug‘ullanuvchi mazkur jinoiy tashkilotlarga qattiq zarba berdik”, — dedi Gonduras Qurolli kuchlari vakili leytenant Xose Koelo.
Xavfsizlik kuchlari statistikasiga ko‘ra, joriy yilda operatsiyalar natijasida musodara qilingan butalar soni 2 625 015 taga yetdi, bu ko‘rsatkich 2020-yilda 424 900 tup, 2021-yilda esa 531 826 tup edi.
“Hukumatning barcha mudofaa va xavfsizlik tuzilmalari bizni kokain ishlab chiqaruvchi davlatga aylanib qolishimizga yo‘l qo‘ymaslik uchun harakat qilmoqda”, — deyiladi mudofaa vaziri o‘rinbosari polkovnik Elias Melgar bayonotida.
Qayd etish joizki, yigirma yildan ortiq vaqtdan buyon Gondurasga Markaziy Amerika orqali Janubiy Amerikadan Meksika va AQSHga kokain o‘tkazish zonasi sifatida qarab kelinadi.
Izoh (0)