Марказий Америкада жойлашган Гондурас ҳукумати 1,6 миллион тупдан ортиқ кока (баргидан кокаин олинадиган тропик бута)ни мусодара қилди, дея хабар бермоқда Reuters.
Мамлакат вакилларининг айтишича, кокаин ишлаб чиқариш учун ишлатиладиган ўсимликлар уч кунлик операция натижасида топилган. Ўсимликлар қирғоқ бўйидаги Колон департаментининг тоғли ҳудудларидаги тўртта плантациядан топилган.
«Бу тарихий мусодара. Биз гиёҳванд моддалар савдоси билан шуғулланувчи мазкур жиноий ташкилотларга қаттиқ зарба бердик», — деди Гондурас Қуролли кучлари вакили лейтенант Хосе Коэло.
Хавфсизлик кучлари статистикасига кўра, жорий йилда операциялар натижасида мусодара қилинган буталар сони 2 625 015 тага етди, бу кўрсаткич 2020 йилда 424 900 туп, 2021 йилда эса 531 826 туп эди.
«Ҳукуматнинг барча мудофаа ва хавфсизлик тузилмалари бизни кокаин ишлаб чиқарувчи давлатга айланиб қолишимизга йўл қўймаслик учун ҳаракат қилмоқда», — дейилади мудофаа вазири ўринбосари полковник Элиас Мелгар баёнотида.
Қайд этиш жоизки, йигирма йилдан ортиқ вақтдан буён Гондурасга Марказий Америка орқали Жанубий Америкадан Мексика ва АҚШга кокаин ўтказиш зонаси сифатида қараб келинади.
Изоҳ (0)