Rossiya Federatsiyasidagi mehribonlik uyida tarbiyalanayotgan besh nafar bola Buxoroda yashayotgan otasi qaramog‘iga qaytarildi. Bu haqda “Daryo”ga Milliy gvardiyaning viloyat boshqarmasi axborot xizmati rahbari Murodjon Rahmatullayev xabar berdi.
Ta’kidlanishicha, Buxoro tumanidagi “Kulonxona” mahallasi, Jizmandi qishlog‘ida yashovchi 45 yoshli fuqaro Shomurod Barakayev 2006-yilda ishlash maqsadida Rossiya Federatsiyasiga chiqib ketgan. Bu paytda uning xotini va bir nafar farzandi bo‘lgan. Oradan ko‘p o‘tmay, ayoli bilan ajrashgan.
Rossiya Federatsiyasida ish boshlagan fuqaro moskvalik Oksana Kuznetsova bilan tanishgan va turmush qurgan. Ulardan 2008-yilda qiz farzand — Tatyana Kuznetsova Shomurodovna, 2009-yilda — Diana, 2010-yilda — Zarina, 2013-yilda — Tolib hamda 2014-yilda Sabrina ismli farzandlar dunyoga kelgan.
Shomurod Bakayev 2018-yilda O‘zbekistonga deportatsiya qilingan va Rossiya Federatsiyasiga kirishi taqiqlangan. Harchand urinmasin, farzandlari holidan xabar ololmagan. Bu orada bolalarning onasi Oksana Kuznetsova esa o‘zining nojo‘ya xatti-harakatlari sabab qamalgan va onalik huquqidan mahrum qilingan. Besh nafar farzand esa Rossiyadagi mehribonlik uyiga topshirgan.
Shundan so‘ng Shomurod Barakayev farzandlarining taqdirini o‘ylab, Tashqi ishlar vazirligi, IIV, Milliy gvardiya hamda Buxoro viloyati hokimligiga murojaat qilib, bolalarining bag‘riga qaytarilishi uchun yordam so‘ragan.
“Hukumat qarori bilan xorijda ota-onasi qaramog‘idan mahrum bo‘lgan O‘zbekiston Respublikasi fuqarolarining bolalarini mamlakatga qaytarish tartibi tasdiqlangan va bu boradagi manzilli ishlar davomiy ravishda amalga oshirilmoqda. Mehnat muhojirlari farzandlarining muammolarini o‘rganish va ularga yechim topish maqsadida Rossiya Federatsiyasi va O‘zbekiston Respublikasi o‘rtasida bolalar huquq va manfaatlarini himoya qilish sohasida o‘zaro hamkorliklar olib borilmoqda. Voyaga yetmaganlarni O‘zbekiston hududiga olib kelish uchun ko‘mak so‘ragan otaga hukumat tomonidan yordam ko‘rsatildi. Besh nafar bola otasi bag‘riga sog‘-salomat qaytarildi”, — deydi Murodjon Rahmatullayev.
Oila viloyat hamda Buxoro tuman hokimligi, Milliy gvardiyaning viloyat boshqarmasi homiyligida oziq-ovqat mahsulotlari, bolalar uchun yotoqxona mebellari va boshqa zarur jihozlar bilan ham ta’minlangan.
Ma’lum bo‘lishicha, Shomurod Barakayev O‘zbekistonga deportatsiya qilingach, 2018-yilda qashqadaryolik fuqaro A.J.ga uylangan, bir nafar farzandi bor va yana farzand kutishmoqda.
“Turmush o‘rtog‘imning Rossiya Federatsiyasida besh nafar farzandi qolib ketganidan xabarim bor edi. Bolalarning onasi qamalgani va bolalarning o‘zi mehribonlik uyiga topshirilganini eshitgan erim qattiq bezovtalandi. Ularni o‘z bag‘riga olib kelishini tushuntirdi. Men rozi bo‘ldim. Gohida onalik qilarmikin, degan gaplar quloqqa chalinib qoladi-da (kulib) Ammo, bolaning begonasi bo‘lmaydi, o‘z erimning bolalari, demak, ular mening ham farzandlarim, Allohga shukur”, — deydi “Daryo” muxbiri bilan telefon orqali suhbatda Nargiza Istamova.
Shomurod Barakayevning aytishicha, turmush o‘rtog‘i rus tilini, Rossiya Federatsiyasidan bag‘riga qaytarilgan farzandlari esa o‘zbek tilini o‘rganmoqda.
Izoh (0)