Eronda musson yomg‘irlari daryolarning o‘zanidan chiqishi va toshqinlarga sabab bo‘ldi, 69 kishi tabiiy ofat qurboni bo‘ldi, deb xabar berdi Tasnim agentligi Eron inqirozlarni boshqarish tashkilotiga tayanib.
Xabarga ko‘ra, yana 45 kishi bedarak yo‘qolgan, ulardan uch nafari Iroq fuqarosi. Qidiruv-qutqaruv operatsiyasi davom etmoqda, qurbonlar soni ortishi mumkin.
Qayd etilishicha, musson yomg‘irlari va suv toshqinlari oqibatida Eronning 31 provinsiyasidan 20 tasida 111 shahar va 310 ta qishloq jabr ko‘rgan.
Iyun oyi oxirida Afg‘onistonda sel va toshqinlar oqibatida 16 kishi halok bo‘lgan, 400 dan ortiq uy qisman yoki to‘liq vayron bo‘lgan edi.
Shuningdek, 21-iyundan 22-iyunga o‘tar kechasi Afg‘oniston sharqida kuchli zilzila sodir bo‘lib, 1,5 mingga yaqin odam halok bo‘lgan edi. Paktika viloyatidagi Gayan, Barmala, Ziruk va Naka tumanlari eng ko‘p jabr ko‘rdi. Ba’zi qishloqlar butunlay vayron bo‘lgan.
Izoh (0)