Odessa portidan makkajo‘xori ortilgan birinchi kema jo‘nab ketdi, u Livanga yo‘l oldi, deb yozadi “Kommersant”. Razoni kemasi Syerra-Leone bayrog‘i ostida suzmoqda.
Kema portni mahalliy vaqt bilan taxminan 8:45 da (Toshkent vaqti bilan 10:45 da) tark etgan. Boshqa tafsilotlar keltirilmayapti.
Moskva va Kiyev o‘rtasida Ukraina portlaridan don olib chiqib ketish haqidagi kelishuvga 22-iyul kuni Istanbulda BMT ishtirokida erishilgan edi. Don ortilgan ilk kemalar Turkiyaga 3-avgust kuni yetib kelishi rejalashtirilgandi. Shundan keyin yuk, shu jumladan, Somaliga yo‘naltirilishi kerak, u yergacha yo‘l bir yarim oyga qadar vaqt olishi mumkin.
Avvalroq Turkiya Mudofaa vazirligi Ukrainada Rossiya harbiy operatsiyasi boshlanganidan buyon birinchi don ortilgan kema Qora dengizdagi portdan 1-avgust kuni mahalliy vaqt bilan 8:30 da (Toshkent vaqti bilan 10:30 da) chiqishini e’lon qilgandi.
Bitimga muvofiq, Kiyev Odessa, Chernomorsk va Janubiy portlari orqali don chiqarib keta oladi. Ukraina infratuzilma vaziri o‘rinbosari Yuriy Vaskov avvalroq eksport Chernomorskdan boshlanishini, keyin esa Kiyev boshqa portlardan kemalarni yuborishga tayyor bo‘lishini aytgan edi. 29-iyul kuni mamlakat prezidenti Vladimir Zelenskiy turk kemasiga yuk ortilayotgan Chernomorsk portiga keldi.
Eksport haqidagi kelishuvlarga ko‘ra, dengiz orqali bug‘doy eksporti uchun xavfsiz yo‘lak yaratildi, yuk ortilishini Turkiya va BMT vakillari kuzatib boradi, kemalarni esa Qora dengizga kirish va chiqishda Anqara, Moskva, Kiyev va BMT vakillaridan iborat muvofiqlashtirish markazi tekshiradi. Rossiya mudofaa vaziri Sergey Shoygu qayd etishicha, bu bo‘sh kemalarda qurol olib o‘tilishini istisno qilish uchun zarurdir.
Eksport uchun mo‘ljallangan don ortilgan kemalar Ukrainada jangovar harakatlar boshlanganidan keyin mamlakat dengiz portlarida qamalib qoldi. Ukraina hukumati va BMT kemalar yo‘lining to‘silib qolishida Rossiyani aybladi. Rossiya Mudofaa vazirligi esa kemalar Ukraina dengizga joylashtirgan minalar tufayli portlardan chiqa olmayotganini ta’kidlagandi.
Izoh (0)