Александр Вучич халқаро ҳамжамиятдан Косоводаги низони тўхтатишни сўради

Сербия дунё ҳамжамияти вакилларига мурожаат қилиб, қисман тан олинган Косово республикаси билан низони тўхтатишни сўради. Бу ҳақда мамлакат президенти Александр Вучич Косово-Сербия чегарасидаги вазият кескинлашиши туфайли Сербия Қуролли кучлари Бош штабида бўлиб ўтган шошилинч йиғилиш якунлари бўйича айтиб ўтди, деб ёзади «РБК».

«Биз барча халқаро вакиллардан бор имкониятни ишга солишни сўрадик. Мулоқот давом этиши ва биз масалани тинч йўл билан ҳал қилишга интилишимиз муҳимдир. Бизда яхши янгиликлар бўлишига ишонаман, буларнинг барчаси бугун кечқурун бўлмаса-да, эртага тугашига умид қиламан… Улар қилган нарсаларнинг барчаси Сербияга ҳужум қанчалик олдиндан ўйланганлигини кўрсатмоқда», — деди у.

Вучич Бош штабга 31 июль куни кечқурун Приштина билан низо кучайиши фонида келганди.

Сербия ва Косово чегарасидаги вазият шу куни кечқурун кескинлаша бошлади. Бунга қисман тан олинган давлат ҳукуматининг сербларга республикага киришда чегарани босиб ўтганлик ҳақида вақтинчалик ҳужжат олиш мажбуриятини юклаш қарори сабаб бўлди. Сербия ҳужжатлари 1 августдан амал қилишдан тўхташи режалаштирилган эди. Приштина шу тариқа Белградга жавоб қилаётганини қайд этди, у эса Косовода берилган гувоҳномаларни тан олишдан бош тортмоқда.

Кейинроқ Косовска-Митровица шаҳрининг жанубий қисмида, шаҳарни ажратиб турувчи кўприк ортида 200 га яқин албанлар тўпланди. Серблар бунга жавобан баррикадалар қура бошлади. Шу куни кечки пайт шаҳарнинг шимолий қисмида сиреналар чалинди. Чегарадан ўтиш жойларига эса Косово махсус кучлари жойлаштирилди. Ўшанда Вучич Приштина Косово сербларига қарши операция тайёрлаётганини, у ярим тунга яқин бошланишини тахмин қилди.

Косово ҳукумати полицияни ва бошқа махсус бўлинмаларни сафарбар қилди. ОАВларга кўра, Приштинадан республиканинг шимолий туманларига қараб миллий полиция махсус бўлинмалари сув замбараклари билан йўлга чиққан, уларга тез ёрдам бригадалари ҳамроҳлик қилган.

Айни вақтда Сербия Мудофаа вазирлиги ўзининг Косово шимолидаги воқеаларда иштирок этаётгани ҳақидаги хабарларни рад этди ва дезинформацияга ишонмасликни сўради.

Россия Ташқи ишлар вазирлиги Приштинанинг хатти-ҳаракатларини қоралаб, унга АҚШ ва Евроиттифоқ ҳомийлик қилаётганини қайд этди.

Аввалроқ Косово ҳукумати Сербия билан чегарада вазиятнинг кескинлашувига сабаб бўлган, қисман тан олинган республика ҳудудида серб ҳужжатларининг амал қилишини тўхтатиш тўғрисидаги қонун қабул қилинишини 1 сентябргача кечиктириш ҳақидаги қарорини эълон қилди.