Navoiyda 3,2 mlrd so‘mlik antmayner qurilmalarini o‘g‘irlab ketgan shaxslar ushlandi

Navoiy viloyati Karmana tumanida antmayner qurilmalarni o‘g‘irlagan shaxslar fosh qilindi, deb xabar bermoqda Ichki ishlar vazirligi.

Qayd etilishicha, 31-may kuni Navoiy shahrida yashovchi A.F. (1995-yilda tug‘ilgan) murojaat qilib, Karmana tumani “Sardoba” mahallasida joylashgan issiqxona hududiga o‘rnatilgan 30 ta Antmayner T19 qurilmalarini noma’lum shaxslar o‘g‘irlaganini ma’lum qilgan. Qurilmalarning umumiy qiymati 3 milliard 285 million so‘m bo‘lgan.

Ushbu holat yuzasidan Jinoyat kodeksining 169-moddasi (o‘g‘rilik) 3-qismi “v” bandi bilan jinoyat ishi qo‘zg‘atilgan.

Mazkur o‘ta og‘ir jinoyatni fosh etish maqsadida IIV Kiberxavfsizlik markazi va uning Navoiy viloyati bo‘linmasi xodimlari bilan hamkorlikda tezkor-texnik tadbirlar o‘tkazilgan. Natijada A.G‘.ga tegishli 2 dona apparat Toshkent shahar Yunusobod tumanida yashovchi antmayner qurilmalarini ta’mirlovchi usta I.A. (1999-yilda tug‘ilgan) tomonidan foydalanib kelinayotgani aniqlangan. Undan ushbu qurilmalar ashyoviy dalil sifatida olingan.

Shundan so‘ng, A.F. Ibragimov bilan tezkor surishtiruv olib borilib, mazkur antmayner qurilmalarni o‘g‘irlagan shaxslar: 1995-yilda tug‘ilgan, Navoiy viloyati Karmana tumanida yashovchi N.F. va 1995-yilda tug‘ilgan, Navoiy viloyati Karmana tumanida yashovchi R.A. ekani aniqlangan.

Tezkor-qidiruv tadbirlari natijasida N.F. va R.A. qo‘lga olingan. N.F.ning yashash xonadonidan 11 dona Antmayner T19 qurilmalari ashyoviy dalil tariqasida hujjatlashtirib olingan.

Hozirda qo‘lga olinganlarning Q.A. ismli hamda boshqa jinoiy sheriklarini aniqlash choralari ko‘rilmoqda.