O‘zbekistonning Indoneziyadagi elchixonasi xodimlari Jakarta shahrida Citilink aviakompaniyasining tijorat direktori Ixvan Agus bilan muzokaralar o‘tkazdi, deb xabar bermoqda “Dunyo” axborot agentligi.
Qayd etilishicha, unda kompaniyaning charter havo qatnovlari va Umra safari bo‘yicha vitse-prezidenti Suzana Valandov, parvozlar tarmog‘ini rivojlantirish bo‘yicha vitse-prezidenti Muhammad Yusuf hamda xalqaro, yuk va charter qatnovlari jadvali bo‘yicha menejer Agung Susilo ham ishtirok etgan.
PT Citilink Indonesia 2001-yilda tashkil etilgan Garuda Indonesia milliy aviakompaniyasining loukosteri (kamxarj parvozlarni amalga oshiruvchi aviakompaniya) hisoblanadi. Joriy yilning iyul oyi holatiga ko‘ra, kompaniya aviaparki 40 taga yaqin samolyotdan iborat bo‘lib, har kuni 200 ga yaqin parvozlarni amalga oshiradi.
“Citilink aviakompaniyasining tijorat direktori ziyorat turizmi doirasida O‘zbekiston orqali parvozlarni amalga oshirish imkoniyatlari istiqbolli ekanini qayd etgan”, — deyiladi xabarda.
Uchrashuv yakuni bo‘yicha O‘zbekiston tomonining ushbu taklifi hamda havo kemalari ijarasi imkoniyati bilan bog‘liq masalalarni muhokama etish uchun uch tomonlama qo‘shma uchrashuvni tashkil etishga kelishib olingan.
Izoh (0)