Neymar korrupsiya ishi bo‘yicha sudda ishtirok etadi.
Braziliyaning DIS investitsiya kompaniyasi “PSJ” futbolchisi, uning ota-onasi, “Barselona”ning sobiq prezidentlari Xosep Bartomeu va Sandro Rosel hamda “Santos”ning sobiq direktori Odilio Rodriges ustidan sudga da’vo arizasi bergan.
DIS 2009-yilda Neymarning transfer huquqi 40 foiziga egalik qilgan. Biroq kompaniya Neymar “Santos”dan “Barselona”ga o‘tgan vaqtda firibgarlik qurboniga aylanganini aytib, 150 million yevrodan ortiq kompensatsiya talab qilgan.
DIS va prokurorlarning fikricha, Neymar “Barselona”ga o‘tayotganda futbolchi hamda uning otasi klub bilan ikkita shartnoma imzolagan. Kompaniya 2016-yilda buni “transfer bozoridagi erkin raqobatning buzilishi”, deya baholagan.
Prokuratura Neymar uchun ikki yillik qamoq va 10 million yevro miqdoridagi jarima so‘ramoqda. DIS esa futbolchini 5 yilga ozodlikdan mahrum qilish, shuningdek, xuddi shuncha muddatga futbol o‘ynashini taqiqlash talabi bilan chiqqan. Undan tashqari futbolchining ota-onasiga ham 5 yillik qamoq jazosi berilishini so‘ramoqda. Prokuratura Neymarning otasini 2 yil, onasini 1 yil muddatga ozodlikdan mahrum etilishi tarafdori.
DIS “Barselona”ning sobiq prezidenti Sandro Roselni va o‘sha vaqtda “ko‘k-anorranglilar” vitse-prezidenti bo‘lgan Xosep Bartomeuni 8 yilga ozodlikdan mahrum etilishini xohlamoqda. Davlat ayblovi esa Roselga 5 yillik qamoq jazosini so‘ragan.
Ushbu ish bo‘yicha 7 ta sud majlisi 2022-yil 17—31-oktabr kunlari bo‘lib o‘tadi.
Dastlab, kataloniyaliklar sobiq prezidenti Sandro Rosel Neymar uchun 57,1 million yevro to‘langanini, keyinroq esa klub va futbolchi o‘rtasida qo‘shimcha shartnomalar bor ekanini aytgandi. Neymarning otasi esa o‘g‘lining transferi 100 million yevro atrofida bo‘lganini ma’lum qilgan.
Izoh (0)