Сенатда «аёллар дафтари»дагиларнинг уйини таъмирлаш ишлари 1 фоизгина бажарилгани танқид қилингани, масъул идора бюджет ва МИБдан маблағ ўз вақтида тушмаганини сабаб қилиб кўрсатгани ҳақида хабар берилган эди. Мажбурий ижро бюроси ҳолат юзасидан муносабат билдириб, жамғармалар учун маблағлар ўз вақтида ўтказилгани, унинг ҳисобварақлардаги айланиши бюро назоратида эмаслигини маълум қилди.
Таъкидланишича, бюро органлари томонидан ижро ҳужжатлари бўйича фуқароларнинг манфаатлари ҳимоя қилиниши билан бирга, ижтимоий ҳимояга муҳтож фуқаролар, боқувчисини йўқотган аёллар ҳамда ишсиз ёшлар масалаларини ҳал этиш бўйича манзилли ишлар олиб борилмоқда.
Давлат раҳбарининг тегишли фармони билан эҳтиёжманд фуқароларни қўллаб-қувватлаш учун жорий этилган «темир дафтар», «аёллар дафтари» ва «ёшлар дафтари» жамғармаларига 2022 йилнинг 1-ярмида 271 миллиард сўм маблағ йўналтирилган. Бу кўрсаткич 2021 йилнинг шу даврига нисбатан 46 миллиард сўм (20 фоиз) кўп ҳисобланади.
Тадбир бошидан эса жами 812 миллиард сўмга яқин маблағлар айнан ушбу жамғармаларга йўналтирилган.
«Ушбу маблағлар Молия вазирлиги ғазначилик ҳисобварақалар орқали айланади, уларнинг қай тарзда жамғармаларга ўтказилиши бюро томонидан назорат қилинмайди», — дейилади муносабатда.
Изоҳ (0)