Тошкентда ШҲТ миллий координаторлар кенгаши мажлиси якунлари ҳамда ШҲТга аъзо давлатлар ташқи ишлар вазирларининг бўлажак йиғилишига доир режаларга бағишланган брифинг ташкил этилди. Унда қатор саволларга жавоб бериб ўтилди.
Хусусан, Шанхай ҳамкорлик ташкилотига аъзо давлатлар миллий координаторлари йиғилиши якунлари ҳақида савол келиб тушди. Ўзбекистоннинг ШҲТ ишлари бўйича миллий координатори Раҳматулла Нуримбетов бунга қуйидагича жавоб қайтарди.
Тадбир жорий йилнинг 24—27 июль кунлари Тошкент шаҳрида Ўзбекистон раислигида ШҲТга аъзо барча саккиз давлатнинг миллий координаторлари иштирокида анъанавий шаклда бўлиб ўтди. 4 кун давом этган йиғилишда жорий йил 28—29 июль кунлари Тошкент шаҳрида бўлиб ўтадиган ШҲТга аъзо давлатлар ташқи ишлар вазирлари кенгашида кўриб чиқиш учун тақдим этиладиган ҳужжатлар рўйхати лойиҳалари келишиб олинди. Шу билан бирга, миллий координаторлар жорий йил 15—16 сентябрь кунлари бўлиб ўтадиган ШҲТ саммитига тайёргарликнинг мазмуний, ташкилий-протокол масалаларини муҳокама қилди, — деди у.Таъкидланишича, учрашувда ташкилот фаолиятининг амалдаги кун тартибидаги масалалар ҳам муҳокама қилинди. Миллий координаторлар кенгаши ШҲТнинг жорий фаолиятини мувофиқлаштирувчи ва бошқарувчи органи ҳисобланади. Айнан шу механизм доирасида давлат раҳбарлари кенгаши, ҳукумат раҳбарлари (бош вазирлар) кенгаши ва ташқи ишлар вазирлари кенгаши йиғилишларига зарур тайёргарлик ишларини олиб боради.
Брифингда, шунингдек, Шанхай ҳамкорлик ташкилоти ташқи ишлар вазирлари кенгашининг Тошкентдаги йиғилишида қайси давлатлар қайси даражада иштирок этаётганига аниқлик киритилди.
Ўзбекистон Ташқи ишлар вазирлиги расмий вакили Юсуф Қобилжонов бу саволга жавоб қайтарди.
Бугунги кунга қадар Шанхай ҳамкорлик ташкилотига аъзо барча давлатлар ШҲТ ташқи ишлар вазирлари кенгаши йиғилишида иштирок этишларини тасдиқлади, хусусан, Ҳиндистон ташқи ишлар вазири Субраманям Жайшанкар, Хитой ташқи ишлар вазири, давлат кенгаши аъзоси Ван И, Қозоғистон бош вазири ўринбосари — ташқи ишлар вазири Мухтор Тлеуберди, Қирғизистон ташқи ишлар вазири Женбек Кулубаев, Покистон ташқи ишлар вазири Билавал Зардорий, Россия ташқи ишлар вазири Сергей Лавров, Тожикистон ташқи ишлар вазири Сирожиддин Мухриддин, ШҲТ бош котиби Чжан Минг ва МАТТ Ижроия қўмитаси директори Руслан Мирзаев, — деди Қабилжонов.Бундан ташқари, ташқи ишлар вазирлари кенгашининг бўлажак йиғилиши кун тартибидаги асосий масалалар ҳақида маълумот берилди.
Афғонистон бўйича халқаро конференциядан сўнг 28—29 июль кунлари Тошкентда яна бир муҳим халқаро тадбир — ШҲТга аъзо давлатлар ташқи ишлар вазирларининг йиғилиши бўлиб ўтмоқда. Юқорида айтиб ўтилганидек, барча томонлар ташқи сиёсат идоралари раҳбарлари даражасида бўлиб ўтадиган учрашувда иштирок этади. Вазирлар учрашуви Ўзбекистоннинг ШҲТга амалдаги раислиги давридаги муҳим воқеалардан биридир.Расмий вакил ташқи ишлар вазирлари кенгашининг Тошкентдаги йиғилишини ёритиш қандай ташкил қилиниши ҳақида ҳам гапирди.Ташқи ишлар вазирликлари раҳбарлари ташкилот фаолиятининг турли йўналишлари бўйича ҳамкорликнинг бугунги ҳолати ва ривожланиш истиқболларини муҳокама қиладилар, долзарб минтақавий ва халқаро муаммолар юзасидан фикр алмашади. Вазирлар учрашувининг муҳим жиҳатларидан бири ШҲТни кенгайтириш истиқболларини муҳокама қилишдир. Хусусан, улар ШҲТнинг тўлақонли аъзоси, аъзо давлати ва мулоқот бўйича ҳамкори мақомини олиш ниятини билдирган 10 дан ортиқ давлатларнинг мавжуд аризаларини кўриб чиқади.
ШҲТ вазирлар кенгашининг Тошкент йиғилишининг асосий якуни Самарқанд саммитига киритиладиган ҳужжатлар лойиҳаларини маъқуллаш бўлади. Бу нафақат кўп қиррали ҳамкорликнинг анъанавий йўналишларини, балки ШҲТ фаолияти соҳаси истиқболлари, хусусан, саноат кооперацияси, минтақалараро савдо ва транспорт алоқалари соҳаларини қамраб олган мустаҳкам ҳужжатлар тўпламидир.
ШҲТ ташқи ишлар вазирлари кенгашининг бўлажак йиғилиши икки томонлама учрашувлар ўтказиш ҳамда минтақавий ва халқаро кун тартибидаги долзарб масалалар муҳокамаси учун яхши платформа бўлиб хизмат қилишини алоҳида таъкидламоқчиман, — дея қайд этди Юсуф Қабилжонов.
Унга кўра, бўлажак тадбир, умуман, мамлакатнинг Шанхай ҳамкорлик ташкилотига раислиги оммавий ахборот воситалари вакилларида катта қизиқиш уйғотмоқда. 2022 йил 30 майдан 1 июлгача Ўзбекистон пойтахтида бўлиб ўтадиган ШҲТ ташқи ишлар вазирлари кенгаши йиғилишини ёритиш учун аризалар қабул қилинди. 160 дан ортиқ ОАВ вакиллари, жумладан, 80 дан ортиқ маҳаллий мухбир ва 75 дан ортиқ хорижий журналист аккредитациядан ўтказилди. Йиғилиш учун матбуот маркази ташкил этилиб, унда журналистлар фаолияти учун барча зарур ташкилий-техник шароитлар яратилган.
Аввалроқ Шавкат Мирзиёев Шанхай ҳамкорлик ташкилотига аъзо давлатлар ташқи ишлар вазирлари кенгашининг тадбирларида иштирок этиш учун мамлакатга келган Хитой давлат кенгаши аъзоси, ташқи ишлар вазири Ван Ини қабул қилганди.
Изоҳ (0)