Qozog‘istonning Air Astana aviakompaniyasi parvozlarni kechiktirgani uchun jarimaga tortildi. Bu haqda mamlakat Fuqaro aviatsiyasi qo‘mitasi xabar berdi. Jarima 16-iyulga rejalashtirilgan Olmaota – Male reysi uzoq muddatga kechiktirilgani munosabati bilan qo‘llangan.
Surishtiruv davomida yo‘lovchilar parvozni 15 soatdan ortiq kutib qolgani aniqlangan. Shu bilan birga, ularga qonun hujjatlarida nazarda tutilgan xizmatlar, ya’ni mehmonxonalarga joylashtirish xizmatlari lozim darajada taqdim etilmagan. Mazkur holat yuzasidan aviakompaniya 3 million tengedan ortiq yoki 6,3 ming dollar miqdorida ma’muriy jarimaga tortildi.
Yo‘lovchilar faqat birgina reysda kuzatilgan muammodan shikoyat qilmagan. Qozog‘iston Fuqaro aviatsiyasi qo‘mitasiga 150 ga yaqin murojaat kelib tushgan bo‘lib, ayni paytda ularning har biri o‘rganib chiqilayotgani, qonunbuzarlik tasdiqlansa, tegishli protsessual choralar ko‘rilishi bildirilgan.
Izoh (0)