Qirg‘izistonda bo‘lib o‘tayotgan Markaziy Osiyo davlatlari rahbarlarining navbatdagi Maslahat uchrashuvida Qozog‘iston prezidenti Qosim Jo‘mart To‘qayev Qozog‘iston Mozori-Sharif–Kobul–Peshovar temiryo‘li qurilishida ishtirok etishga tayyorligini ma’lum qildi.

Uning so‘zlariga ko‘ra, “biz temir yo‘llarning yer ustki qurilmalari uchun materiallar bilan uzluksiz ta’minlab, harakatdagi sostav taqdim qilishimiz mumkin”.

Eslatib o‘tamiz, avvalroq Mozori-Sharif–Kobul–Peshovar temiryo‘li loyihasining yo‘nalishi va texnik-iqtisodiy asoslarini aniqlash bo‘yicha ekspeditsiya ishlari boshlangan edi. Temiryo‘lining uzunligi 600 km bo‘ladi, taxminiy qiymati — 5 mlrd dollar.

Loyiha to‘liq amalga oshirilgach, Pokistondan O‘zbekistonga yuk tashish 35 emas, 3-5 kun davom etishi, bitta standart yuk konteynerini tashish narxi qariyb uch barobarga arzonlashishi kutilmoqda. Shu bilan birga, ushbu yo‘nalish bo‘yicha yuk tashish hajmi 10 million tonnaga yetishi mumkin.