“Otamdan qolgan dalalar” filmi Shuhrat Abbosov ijodida ham, o‘zbek kino olamida ham durdona asar hisoblanadi.
Filmdagi bosh qahramon Dehqonqul obrazini kim gavdalantirishi borasida katta kino kasting jarayonlari bo‘lib o‘tgan.
O‘sha vaqtda jismoniy tarbiya fani o‘qituvchisi bo‘lgan A’zam Shokirjonov Dehqonqul obraziga tasdiqlanish tarixi haqida “Daryo” muxbiri Feruz Muhammadga bergan intervyusida gapirib berdi.
Men o‘ylayman balkim bu shaxsga tegish bo‘lib qoladimi, xullas to‘rtta xalq artisti men bilan birgalikda ushbu filmning kastingiga kelgan. Ular O‘zbekiston xalq artistlari Yodgor Sa’diyev, Erkin Komilov, Murod Rajabov, Rustam Sagdullayevlar edi.Ma’lumot uchun, A’zam Shokirjonov 1951-yil, 26-aprel kuni Sirdaryo viloyati, Sirdaryo tumanida dunyoga kelgan. Kurash bo‘yicha 23 karra O‘zbekiston chempioni, 5 karra Osiyo chempioni, 3 karra Jahon Chempioni. “Tong otguncha”, “Otamdan qolgan dalalar”, “Lafz”, “Chegaradagi qishloq”, “Amir Temur”, “Zanjir”, “Said va Saida” kabi 25 dan ortiq filmning 13 tasida bosh rolni ijro etgan. O‘zbekistonda xizmat ko‘rsatgan murabbiy, dotsent. Hozirda Prezident akademiyasining Jismoniy tarbiya kafedrasi mudiri lavozimida faoliyat yuritadi.“Shunday xalq artistlarining oldida kastingdan qanday yorib o‘tdim ekan”, deb o‘zimga savol beraman. Bu rejissorning ustaligi deb o‘ylayman. Rejissor xohlasa sizni shunaqa ustalik bilan obrazga kiritib qo‘yar ekan, hozir ham o‘sha filmni ko‘rsam, “shu rolni nahotki men o‘ynaganman”, deb yig‘layman.
Shuhrat Abbosov “bu yerda bunday harakat, bu epizodda bunaqa vajohat, bunaqa mimika”, deb turgan. Bu filmning tagida baribir ham rejissorning ustaligi yotadi. Ko‘p rejissorlar hozir ham aktyorning kuchidan foydalanib film qiladi. Shuhrat akadek aktyorni obrazga kirita oladigan rejissor ko‘rmadim. Ular haqqoniy rejissor, metr, professor, akademik desak ham bo‘ladi. Men oddiy jismoniy tarbiya o‘qituvchisiman. Ular men orqali shunchalik katta bir obraz yaratgan.
Shuhrat Abbosov taniqli insonlar bilan emas, tanilmagan insonlar bilan ishlagan, Shuhrat aka bilan ishlaganlar mashhur bo‘lib ketavergan. Masalan, “Hamza” filmigacha O‘lmas Alixo‘jayev mashhur emas edi. Ammo filmda qanaqa zo‘r o‘ynab qo‘ygan.
Albatta bu Shuhrat Abbosovning ko‘p kitob o‘qiganidan dalolatdir. Afsus, afsus shunday insonni 19 yil kinodan chetlatib qo‘yishdida, bo‘lmasa yana juda ko‘p zo‘r filmlar qolardi undan.
A’zam Shokirjonov, O‘zbekistonda xizmat ko‘rsatgan murabbiy, dotsent
Izoh (0)