Buxoroda “Jiguli” guvohnomasidagi dvigatel raqamini yo‘q qilib berish uchun 3 mln so‘m olgan shaxs ushlandi

Buxoro viloyati Jondor tumanida o‘tkazilgan tezkor profilaktik tadbirda firibgarlik holatlari fosh etildi, deb xabar beradi Ichki ishlar vazirligi.

Qayd etilishicha, fuqaro O.T. o‘zganing mulkini aldash yoki ishonchini suiiste’mol qilish yo‘li bilan talon-toroj qilish maqsadida Jondor tumani “Sho‘robod” MFY Yangihayot qishlog‘i hududida joylashgan “Nastarin” restorani oldida tanishi O.Sh.ning boshqa bir tanishi X.B.ga tegishli bo‘lgan “VAZ-2106” avtomashinasining transport vositasini qayd etish guvohnomasidagi dvigatel raqamini raqamsiz qilib berishni va’da qilgan. Uni aldab, ishonchiga kirib, O.Sh.dan kimyoviy ishlov berilgan 3 million so‘m miqdoridagi pullarni olish vaqtida tegishli tartibda rasmiylashtirib olingan.

Bundan tashqari, u o‘zining jinoiy harakatlarini takroran davom ettirib, yuqoridagi manzil oldida fuqaro M.X.ga haydovchilik guvohnomasi olish uchun bo‘lib o‘tadigan nazariy va amaliy imtihondan o‘tkazib berishni va’da qilib, uning ham ishonchiga kirib, undan kimyoviy ishlov berilgan 200 dollarni olish vaqtida tegishli tartibda hujjatlashtirilib olingan.

Holatlar yuzasidan fuqaro O.T.ga nisbatan Jinoyat kodeksining 168-moddasi (firibgarlik) 1 va 3-qismi “b” bandi bilan jinoyat ishi qo‘zg‘atilib, dastlabki tergov harakatlari olib borilmoqda.