Huquqni muhofaza qilish idoralari tomonidan amalga oshirilgan tezkor tadbirlar natijasida Toshketning Sergeli va Olmazor tumanlarida yashovchi taqiqlangan “Hizb ut-Tahrir” diniy-ekstremistik tashkiloti a’zolarining faoliyatiga chek qo‘yildi, deb xabar bermoqda IIV matbuot xizmati.
Aniqlanishicha, ikki erkak — A.F. (1978-yilda tug‘ilgan), M.A. (1980-yilda tug‘ilgan) va bir nafar ayol A.G. (1983-yilda tug‘ilgan) ushbu jinoiy guruhning a’zolari sifatida faoliyat yuritgan.
Guruhning faol a’zolari bo‘lgan erkaklar Toshkent shahrida joylashgan “Avtomobil bozori”, “Jomiy bozori” va “Bekto‘pi bozorlari”da bo‘yoq tarqatish va sotish bilan shug‘ullanib, biznes hamkorlari hamda yaqin qarindoshlariga Telegram’da tashkil qilgan bir nechta guruhlari orqali “Hizb ut-Tahrir” materiallarini tarqatib, ularni “tahrirchilar” safiga a’zo bo‘lishga da’vat qilgan.
Ushbu shaxslarning jinoiy harakatlari “Hizb ut-Tahrir”ning faol yollovchilari hisoblangan, ayni paytda xalqaro qidiruvda bo‘lgan Mahmud Abdulmo‘min (1980-yilda Qirg‘izistonda tug‘ilgan, Maxmudjon Xoldarov) va Islom Abu Halil (1984-yilda Namangan viloyati Namangan shahrida tug‘ilgan Ismoil Nurmatov) tomonidan boshqarilgan.
Bundan avval Toshkentda “Hizb ut-Tahrir”ga a’zo besh kishi qo‘lga tushgani haqida xabar berilgan edi. Mazkur jinoiy guruhning faoliyati ham Mahmudjon Xoldarov tomonidan boshqarilgan.
Izoh (0)