Qashqadaryo viloyatining Dehqonobod tumani hokimi Zoir Aliqulov viloyatdagi hamkasblarining OAVga qay darajada ochiqligi haqida gapirdi. Bu haqda “Daryo”ga tuman hokimligi axborot xizmati xabar berdi.
Hokim bloger Jonibek Norqulovning “hamkasblaringizdan aynan kimlarni OAV uchun ochiq deb ayta olasiz”, degan savoliga “Hamkasblarimdan Shahrisabz tumani hokimi va G‘uzor tumani hokimlarining OAVga bo‘lgan ochiqligiga, shuningdek, viloyatimiz rahbarining ommaviy axborot vositalariga bo‘lgan e’tiborini ko‘rib, havas qilaman.
Shuningdek, ijtimoiy tarmoqlarda Qarshi shahar hokimining ham barcha OAV vakillari uchun doimo ochiqligini ko‘ramiz. O‘ylaymanki, Qashqadaryoda OAV vakillari uchun to‘siq qo‘ygan yoki ulardan qochadigan hokimlar yo‘q. Barchasi OAV uchun ochiq va oshkora.
Faoliyatini to‘g‘ri tashkil qilgan rahbar OAVdan qo‘rqmaydigan, ular bilan to‘g‘ridan to‘g‘ri munozara qilishga tayyor rahbar bo‘ladi. Tan olamiz, siz jurnalistlarning savollaringizga ba’zan qanday javob berishni bilmaydigan yoki OAV vakillaridan qochayotgan rahbarlarni ham ko‘rganmiz”, — deya javob bergan.
Eslatib o‘tamiz, avvalroq Shahrisabz tumani hokimi Samad Hasanov uni g‘alla o‘g‘riligida ayblagan fermerni OAV vakillari va blogerlar oldida kameralar qarshisida suhbatga chorlagani, ammo fermer voqea joyiga kelib, hokim bilan yuzma-yuz bo‘lmay ketib qolgani xabar berilgandi.
Izoh (0)