“Metan gaz narxlari ko‘tarilganicha yo‘q, biroq sezilarli tafovutlar bor”. “Daryo” muxbirlari gaz quyish shoxobchalaridagi narx-navoni o‘rgandi

Vazirlar Mahkamasining joriy yil 14-iyuldagi qaroriga muvofiq yuridik shaxslar uchun tabiiy gaz va elektroenergiya uchun tariflar oshirilishi vaqtinchalik to‘xtatilgandi. Shunga qaramay, ijtimoiy tarmoqlarda ayrim gaz quyish shoxobchalarida 15-iyuldan boshlab metan narxi oshirilgani haqidagi xabarlar tarqaldi.

“Daryo” muxbirlari hududlardagi gaz quyish shoxobchalarida bo‘lib, narx-navo bilan bog‘liq holatni o‘rgandi.

Namangan

Namangandagi avtomobillarga gaz to‘ldirish kompressor shoxobchalarida (AGTKSH) narx-navo o‘zgargani yo‘q. Bu haqda “Daryo” muxbiri Azizbek Abduvaliyev xabar bermoqda.

Namangan shahridagi gaz to‘ldirish shoxobchalarining ayrimlarida 2700 so‘m narx belgilangan. Shu bilan birga, 2600 so‘m va 2800 so‘mdan sotayotganlari ham bor. Bu shoxobchaning joylashgan o‘rni va tadbirkorlik subyektlarining narx siyosatiga bog‘liq.

“Shu haqdagi gap-so‘zlar paydo bo‘lganidan so‘ng o‘zim bir qancha shoxobchalarga borib keldim. Tumanlar bilan bog‘lanib, narx-navo bilan qiziqdim. Holat o‘zgarmagan, shoxobchalarda 2600—2800 so‘m atrofida gaz to‘ldirishyapti”, — deydi “Hududgaz Namangan” gaz ta’minoti filiali direktorining birinchi o‘rinbosari O‘tkirbek Mamadaliyev.

Ma’lumot uchun, bugungi kunda Namangan shahrida 27 ta, viloyat bo‘yicha esa jami 115 ta avtomobillarga gaz to‘ldirish kompressor shoxobchasi faoliyat ko‘rsatmoqda.

Buxoro

“Hududgaz Buxoro” gaz ta’minoti filiali axborot xizmati rahbarining “Daryo”ga bildirishicha, viloyat bo‘yicha jami 73 ta avtomobillarga gaz to‘ldirish kompressor shoxobchasi mavjud bo‘lib, hammasi to‘liq faoliyat olib bormoqda. Mazkur AGTKSHlarida narxlar bir xil, ya’ni 1 kub gaz 2600 so‘mdan sotilmoqda.

Viloyatda metan gaz tanqisligi kuzatilmagan, lekin benzin yetishmovchiligi mavjud.

“Viloyatning Buxoro shahridan boshqa hududlarida benzin sotilmayapti. Buxoro shahridagi shoxobchalardan biridan bugun 5 litr A-80 benzini xarid qildim. Benzini sifatsiz chiqdi. Avtomashinamning yurishida muammolar tug‘ildi. Majburlikdan metan gaz quydim. Narxi o‘zgarmagan, 2600 so‘mdan oldim”,— deydi kogonlik Avaz Ahmedov.

Hayot Davlatov esa bir necha kundan buyon shaxsiy avtomobilidan foydalanmayotganini bildirgan.

“A-91 benzini yo‘qligi bois ishga taksida qatnayapman. Avtomobilim rusumiga na A-80, na metan gaz to‘g‘ri keladi”,— deydi u.

Andijon

“Daryo” muxbiri Umidjon Mamarasulovning ma’lum qilishicha, Andijon viloyatidagi gaz quyish shoxobchalarida metan narxi 2800 so‘mdan sotilishda davom etmoqda.

“Vazirlar Mahkamasi qaroriga asosan gaz narxi 15-iyuldan oshishi kerak edi. Ammo belgilangan muddat yaqin qolganda oshirmaslik tavsiya etilib, qaror ijrosini ta’minlash to‘xtatildi. Ayni paytda bizning shoxobchamizdagi narx o‘zgarmasdan 2800 so‘m holatda qolmoqda”, — deydi ismini aytishni istamagan gaz quyish shoxobchalaridan birining ish boshqaruvchisi.

Shu bilan birga, Andijon—Xonobod avtomobil yo‘lida gaz quyish shoxobchalarining ayrimlari aksiya o‘tkazishni boshlashgan. Ushbu shoxobchalarda metan narxi 2300 so‘mgacha tushirilgan.

Farg‘ona

“Daryo”ning Farg‘onadagi muxbirining bildirishicha, viloyatda metan gaz narxlari o‘zgarmagan, faqat joylashgan hududlariga qarab farqlar mavjud. Ayni paytda viloyatdagi shoxobchalarda narx 2300 so‘mdan 2600 so‘mgacha belgilanganini kuzatish mumkin.

Qoraqalpog‘iston

Qoraqalpog‘istonda ham shunday manzarani ko‘rish mumkin. Bu yerdagi metan gaz quyish shoxobchalarida narx ko‘tarilmagan, biroq hududlarda turlicha narx belgilangan. Aytaylik, To‘rtko‘l tumanidagi shoxobchalarida 1 kub metr metan gaz 2200—2400 so‘m bo‘lsa, Amudaryoda 2400—2500, Nukus shahrida 2500—2600, Qo‘ng‘irotda esa 2500—2700 so‘mdan iborat.

Ma’lumot uchun, Monopoliyaga qarshi kurashish qo‘mitasi mutasaddilarining bildirishicha, metan gaz narxlari doimiy monitoring qilib borilmoqda va avtomobillarga gaz quyish shoxobchalari metan gazi narxlarini sun’iy ravishda oshirgan taqdirda belgilangan tartibda tegishli chora ko‘riladi.

Mavzuga doir:

• Metan narxini oshirishning obyektiv sabablari yo‘q. Energetika vazirligi gaz quyish shoxobchalarida narxlar oshgani haqida
• Metan gazi narxlarini sun’iy ravishda oshirgan gaz quyish shoxobchalariga chora ko‘riladi — Antimonopoliya qo‘mitasi