Bosh prokuror Nig‘matilla Yo‘ldoshev rahbarligida prokuratura, bosh prokuratura huzuridagi iqtisodiy jinoyatlarga qarshi kurashish departamenti va majburiy ijro byurosi xodimlari ishtirokida bosh prokuratura hay’atining navbatdagi yig‘ilishi bo‘lib o‘tdi.
Videoselektor tarzida o‘tkazilgan hay’at majlisida prokuratura organlarining mamlakatda qonuniylikni mustahkamlash, fuqarolarning huquq va erkinliklarini muhofaza qilish, jinoyatchilik va huquqbuzarliklarning oldini olish borasida 2022-yil 1-yarmidagi faoliyati natijalari tanqidiy muhokama qilindi.
Hay’at majlisida Bosh prokuror Nig‘matilla Yo‘ldoshev ma’ruza qilib, o‘tgan yarim yilda prokuratura organlari tomonidan amalga oshirilgan ishlar va yo‘l qo‘yilgan xato-kamchiliklarga birma-bir to‘xtalib o‘tdi.
Qayd etilganidek, prokuratura organlarining bugungi faoliyati O‘zbekiston Respublikasi prezidenti rahbarligida amalga oshirilayotgan shiddatli islohotlarni, jumladan Yangi O‘zbekistonning Taraqqiyot strategiyasini amalda ro‘yobga chiqarish, bu borada belgilangan vazifalar ijrosini so‘zsiz ta’minlash, tinchlik va osoyishtalikni saqlash, umuman, barcha sohalarda qonuniylikni mustahkamlashga yo‘naltirilgan.
Shu maqsadda o‘tgan yarim yilda prokuratura organlari tomonidan 60 mingga yaqin nazorat hujjatlari qo‘llanilib, 100 ming fuqaroning buzilgan huquqlari tiklangan.
Prokuror tekshirishlari va dastlabki tergov davomida aybdor shaxslardan fuqarolarga va davlat manfaatlariga yetkazilgan 636 milliard so‘mlik zararning undirilishi ta’minlangan.
Aholini ijtimoiy muhofaza qilish, bandligini ta’minlash, muhtoj oilalarni, yoshlar va xotin-qizlarni har tomonlama qo‘llab-quvvatlashga oid qonunchilik ijrosini ta’minlashga alohida e’tibor qaratilgan.
Bevosita prokurorlar sa’y-harakati bilan qisqa muddatda 160 mingdan ortiq ehtiyojmand oilaga har tomonlama ko‘mak berilgan, qariyb 172 ming nafar ishsiz fuqaroning bandligi ta’minlangan.
Shu bilan birga, mavjud muammolarni bartaraf qilish borasida ayrim hududlarda yo‘l qo‘yilgan kamchiliklar tanqid qilinib, tadbirlarni yanada jonlantirish, ayniqsa, mahallabay ishlarni samarali tashkil etish, tegishli daftarlarga kiritilgan fuqarolar bilan manzilli ishlash bo‘yicha belgilangan vazifalar ijrosiga e’tiborni yanada kuchaytirish zarurligi ta’kidlandi.
Tadbirkorlik subyektlarini har tomonlama qo‘llab-quvvatlash, qulay biznes muhitini yaratish masalasiga ham alohida to‘xtalib o‘tildi.
Xususan, tadbirkorlikni jadal rivojlantirish, investitsiyalarni jalb etish, eksport hajmini oshirish kabi iqtisodiyot rivojidagi dolzarb yo‘nalishlarda tizimli tadbirlar amalga oshirilib, 2 ming nafardan ortiq tadbirkorning buzilgan huquqlari tiklangan, 10 ming nafardan ortig‘iga muammolarini bartaraf etishda ko‘maklashilgan.
Hay’at yig‘ilishida ijtimoiy va ishlab chiqarish infratuzilmasini rivojlantirishga oid investitsiya dasturlari, shu jumladan “Obod qishloq” va “Obod mahalla” dasturlari ijrosi ahvoli alohida o‘rin egalladi.
Qayd etilishicha, Bosh prokuraturada tashkil qilingan alohida shtab va ishchi guruhlar tomonidan dasturlar ijrosi qat’iy nazoratga olingan, qonun buzilishlarni, ayniqsa, ajratilgan mablag‘lardan oqilona va samarali foydalanish, talon-torojliklarning oldini olish bo‘yicha boshqa idoralar bilan hamkorlikda tizimli tadbirlar amalga oshirilmoqda.
Yig‘ilishda yer resurslaridan samarali va oqilona foydalanishni ta’minlash masalalariga ham to‘xtalib, bu borada o‘tkazilgan nazorat tadbirlarida 3495 gektar yer maydonlari o‘zboshimchalik bilan egallanganligi, 1830 gektar zaxirasiga qaytarilishi ta’minlanganligi, shuningdek, 12 487 gektar yer maydonlarini talon-toroj qilish bilan bog‘liq holatlar yuzasidan 574 ta jinoyat ishi qo‘zg‘atilganligiga urg‘u berildi.
Shu bilan birga, bu masalada prokuratura organlari zimmasiga katta mas’uliyat va javobgarlik yuklatilganligi mas’ullarga yana bir bor uqtirilib, galdagi vazifalar belgilab berildi.
Qishloq xo‘jaligi ekinlarini yetishtirish, jumladan o‘ta muhim bo‘lgan g‘allani nest-nobud qilmasdan yig‘ishtirib olish, uning joriy qilingan yangi mexanizmlar asosida realizatsiya qilinishi, hisob-kitob ishlarining o‘z vaqtida amalga oshirilishini ta’minlash ishlariga jiddiy e’tibor qaratish zarurligi uqtirildi.
Bosh prokuror o‘ta dolzarb bo‘lgan jinoyatchilikka qarshi kurashish ishlarini tashkil qilish borasidagi muammolar va yo‘l qo‘yilayotgan xato-kamchiliklarni keskin tanqid ostiga oldi.
Huquqbuzarliklar profilaktikasi tadbirlarini yanada kuchaytirish, vaziyatning barqarorligiga salbiy ta’sir ko‘rsatuvchining omillarni barvaqt aniqlash va bartaraf etish, jinoyatga jazo muqarrarligini ta’minlashning barcha choralarini ko‘rish zarurligi qat’iy ta’kidlandi.
Sudlarda fuqarolik, jinoiy, ma’muriy va iqtisodiy ishlar ko‘rilishida prokuror vakolatini ta’minlash masalalari ham hay’at e’tiboridan chetda qolmadi.
Sudda prokuror vakolatini samarali ta’minlash, ayniqsa, sud ishlariga asossiz aralashishlarning oldini olish, shu bilan birga, noqonuniy sud qarorlariga nisbatan o‘z muddatida munosabat bildirib borish bo‘yicha tegishli vazifalar belgilab berildi.
So‘z yuritilganidek, xalq bilan ochiq muloqot qilish, fuqarolarning qiynayotgan muammolarini hal etishga ustuvor ahamiyat qaratilib, hisobot davrida 108 mingdan ortiq murojaat bevosita prokuraturada hal etilgan va 10 ming nafardan ortiq shaxsning buzilgan huquqlari tiklab berilgan.
Murojaatlar bilan ishlash, faoliyatga oshkoralik berish, qonun ijodkorligi, prokuratura ishiga raqamli texnologiyalarni keng joriy qilishga oid ko‘rilayotgan chora-tadbirlarni yanada jadallashtirish lozimligi qayd etildi.
Yig‘ilishda Bosh prokuratura huzuridagi Iqtisodiy jinoyatlarga qarshi kurashish departamenti hamda Majburiy ijro byurosi faoliyati haqida ham so‘z yuritildi.
Jumladan, hududiy prokurorlarga departament organlari bilan birgalikda oziq-ovqat xavfsizligini ta’minlash, narx-navo barqarorligini saqlashga qaratilgan tadbirlarni yana kuchaytirish, byuro zimmasiga sud va boshqa organlar hujjatlari ijrosini o‘z muddatida to‘liq ta’minlab, natijadorlikka erishish borasida aniq vazifalar belgilab berildi.
Umuman, hay’at yig‘ilishida asosiy e’tibor prokuratura organlarining yarim yillik faoliyatida yo‘l qo‘yilgan kamchiliklar, xato va nuqsonlar, ularni bartaraf etish choralari hamda galdagi dolzarb vazifalarga qaratildi.
Hay’at majlisida mas’ullarning izohlari tinglanib, kamchiliklarni bartaraf etish bo‘yicha ijro muddatlari aniq ko‘rsatilgan topshiriqlar berildi.
Barcha xodimlar xotirjamlikka berilmasdan, yuklatilgan vazifalarni to‘laqonli va so‘zsiz ijro etishlari, tashabbuskor va fidoyi bo‘lishlari shartligi qat’iy belgilandi.
Hay’atda ko‘rilgan masalalar yuzasidan tegishli qaror qabul qilindi.
Izoh (0)