Qoraqalpog‘istondagi MTT yo‘llanmalarining amal qilish muddatlari 13-iyundan vaqtincha to‘xtatildi

O‘zbekiston Respublikasi Vazirlar Mahkamasining tegishli qarori asosida Maktabgacha ta’lim vazirligi tomonidan bolalarni maktabgacha ta’lim tashkilotlariga qabul qilish bo‘yicha davlat xizmatlari ko‘rsatilmoqda.

Bugungi kunda Qoraqalpog‘iston Respublikasi hududida internetga ulanishda kuzatilayotgan ayrim nosozliklar va uzilishlar tufayli maktabgacha ta’lim tashkilotlariga joylashtirish uchun shakllangan yo‘llanmalarni elektron tizim orqali rasmiylashtirishda muammolar kuzatilmoqda.

Shularni inobatga olgan holda 2022-yilning 13-iyunidan boshlab Qoraqalpog‘iston Respublikasidagi maktabgacha ta’lim tashkilotlariga shakllangan yo‘llanmalarning amal qilish muddatlari hisobi internetga ulanishda muammolar bartaraf etilgunga qadar to‘xtatib turiladi hamda internet tarmog‘ining barqaror ishlashi ta’minlangan kundan boshlab amaldagi tartibga ko‘ra amal qilish muddati hisoblanadi.