Andijon viloyatidagi yuridik xizmat ko‘rsatish markazlari 1-iyuldan boshlab maktab, bog‘cha va poliklinikalarga xizmat ko‘rsatishni boshladi. Bu haqda “Daryo”ga viloyat adliya boshqarmasi axborot xizmati ma’lum qildi.
Ma’lum qilinishicha, prezidentning 2022-yil 18-martdagi “Yuridik xizmat ko‘rsatish markazlari faoliyatini yanada kengaytirish bo‘yicha qo‘shimcha chora-tadbirlar to‘g‘risida”gi qaroriga asosan joriy yilning 1-avgustdan boshlab yuridik xizmat ko‘rsatish markazlari tomonidan xizmat bilan ta’minlanmagan davlat organlari va tashkilotlarining quyi bo‘linmalariga yuridik xizmat ko‘rsatilishini yo‘lga qo‘yish rejalashtirilgan.
“Shu munosabat bilan viloyatimizning barcha shahar va tumanlarida Adliya vazirligining ishchi guruhi tomonidan qarorning mazmun mohiyatini tushuntirishga qaratilgan hamda “e-huquqshunos” elektron tizimidan foydalanish bo‘yicha o‘quv-seminarlari o‘tkazilmoqda. Unda xizmat ko‘rsatilishi belgilangan mahalla va oilani qo‘llab-quvvatlash bo‘limi, aholi bandligiga ko‘maklashish markazi, soliq inspeksiyasi, davlat umumiy o‘rta ta’lim maktablari hamda maktabgacha ta’lim tashkilotlari, ko‘p tarmoqli va oilaviy poliklinikalarning mas’ullari ishtirok etmoqda.
Seminarlarda davlat tashkilotlarida yuridik xizmat ko‘rsatish bilan bog‘liq ma’lumot va jarayonlarni elektron ravishda yig‘ish, qayta ishlash, tahlil qilish imkonini beruvchi “e-huquqshunos” elektron tizimining qulayliklari, davlat tashkilotlarining mulkiy hamda boshqa huquqlari, qonuniy manfaatlari o‘z vaqtida samarali himoya qilinishi, davlat tashkilotlari tomonidan qabul qilinayotgan hujjatlarning qonuniy, har tomonlama puxta va sifatli bo‘lishini ta’minlash ekanligi tushuntirilmoqda”, — deydi viloyat adliya boshqarmasi boshlig‘ining birinchi o‘rinbosari Muhammadbobur Karimov.
O‘tkazilgan seminarlar davomida eksperiment tartibida bittadan maktab hamda maktabgacha ta’lim tashkilotlari tanlab olinib, ushbu muassasalarda “e-huquqshunos” elektron tizimi bilan ishlash amaliyoti o‘rgatilmoqda.
Izoh (0)