Namanganlik gulchilar Bishkek va Samarqandni ko‘kalamzorlashtirishda ishtirok etmoqda. Bu haqda “Daryo” muxbiri Azizbek Abduvaliyev xabar bermoqda.
Namanganda bo‘lib o‘tgan 61-xalqaro gullar festivaliga Bishkek meri Emilbek Abduqodirov boshchiligidagi delegatsiya ham mehmon bo‘lib kelgan va bu safar davomida Qirg‘iziston poytaxtiga Namangandan 500 ming tup gulni beg‘araz yetkazib berish haqida kelishuvga erishilgandi.
Bugungi kunda Bishkekda 10 gektar maydonda barpo etilayotgan “Balalik” nomli bolalar parkida gulchilar Namanganda yetishtirilgan gullarni olib borib, o‘ziga xos landshaft dizayni asosida ekish ishlariga kirishdi.
“Jami 500 ming tup gul ekishni rejalashtirilganmiz. Hozirga qadar biz uchun ajratilgan hududda yerlarni tayyorlab, 350 ming tupdan ortiq gullar ekilishiga erishildi. Bishkekda 30 nafar gulchimiz qirg‘izistonlik hamkasblariga ko‘mak beryapti, — deydi Namangan shahar obodonlashtirish boshqarmasi boshlig‘i Husniddin Qozoqboyev.
Namanganlik gulchilar joriy yil 15—16-sentabr kunlari Shanxay hamkorlik tashkilotining navbatdagi sammitiga mezbonlik qiladigan Samarqand shahrining markaziy ko‘chalari va xiyobonlarini ham gullar bilan bezatmoqda.
“Samarqandda biz tomonimizdan 10 xil turdagi 300 ming tup gul ekilishi ko‘zda tutilgan. Bugungi kungacha 100 ming tupdan ortiq gul ekishga ulgurdik. Bu yerda ham 30 nafarga yaqin xodimlarimiz mehnat qilmoqda”, — deydi Husniddin Qozoqboyev.
Ma’lumot uchun, Namanganda bo‘lib o‘tgan 61-xalqaro gullar festivali kunlari Samarqand delegatsiyasi uchun amaliy seminar tashkillangan va bu seminar doirasida gullar shahridagi ko‘kalamzorlashtirish tajribasi bilan o‘rtoqlashilgan edi.
Izoh (0)