Qoraqalpog‘iston Respublikasidagi vaziyatning barqarorlashgani va hudud aholisining odatdagi hayot tartibiga qaytayotgani sababli favqulodda holat rejimiga o‘zgartirish kiritildi. Bu haqda prezident matbuot kotibi xabar qildi.
Qayd etilishicha, prezident tomonidan Qoraqalpog‘iston hududida joriy etilgan favqulodda holat rejimini yumshatish, ya’ni komendantlik soatining amal qilish vaqtini “soat 21 dan soat 7 ga qadar” o‘rniga “soat 23 dan soat 5 ga qadar” etib belgilashga qaror qilingan.
Qoraqalpog‘istonda favqulodda holat joriy etish to‘g‘risidagi 2022-yil 2-iyuldagi prezident farmoniga tegishli o‘zgartirishlar kiritish to‘g‘risidagi farmon Shavkat Mirziyoyev tomonidan imzolangan va Oliy Majlis palatalariga tasdiqlash uchun yo‘llangan.
Eslatib o‘tamiz, Qoraqalpog‘istonda bo‘lib o‘tgan tartibsizliklar sabab prezident farmoni bilan hududda 3-iyuldan 2-avgustgacha favqulodda holat joriy etilib, bir qator chora va vaqtinchalik cheklovlar o‘rnatilgandi. Favqulodda holat amal qilishi davrida O‘zbekiston Mudofaa vazirligi kuchlari va vositalari qo‘shimcha ravishda jalb etilishi belgilangan.
Izoh (0)