Farg‘onadagi muzeyda 2,5 milliard so‘mlik noyob eksponatlar qalbakilashtirilgani aniqlanib, holat yuzasidan jinoyat ishi qo‘zg‘atilgan, deya xabar berdi “Daryo” muxbiri.
Qayd etilishicha, Bosh prokuratura tomonidan Farg‘ona viloyati tarixi va madaniyati davlat muzeyi o‘rganilgan.
O‘rganish davomida muzeyda saqlanayotgan umumiy bahosi 2,5 mlrd so‘mlik 70 ta noyob eksponatlar (ulardan 56 tasi rangtasvir asari) qalbakilashtirilgani, muzeyni kapital ta’mirlash uchun budjetdan ajratilgan 3,1 mlrd so‘m mablag‘ning 1,4 mlrd so‘mi mansabdor shaxslar tomonidan talon-toroj qilingani aniqlangan.
Shuningdek, muzeyda saqlanishi lozim bo‘lgan 1 dona rangtasvir va 1 dona grafika asari topilmagan.
“2011-yil 21 nomdagi ashyolarning haqiqiyligini tekshirish maqsadida ular muzey tomonidan Farg‘ona viloyati Ichki ishlar boshqarmasiga topshirilgan. Ulardan 14 nomdagi ashyolar 2016–2020-yillar davomida muzeyga qaytarilgan, ammo qolgan 7 dona rangtasvir asari qaytarilmagan. Hozirgi kunda Farg‘ona viloyati Ichki ishlar boshqarmasida ushbu 7 dona rangtasvir asarlari mavjud emasligi aniqlangan”, — deydi “Daryo” muxbiri bilan suhbatlashgan manba.
Bosh prokuratura matbuot xizmatining ma’lum qilishicha, holat yuzasidan jinoyat ishi qo‘zg‘atilib, tergov harakatlari olib borilmoqda.
Izoh (0)