2020—2021 йилларда дунё аҳолиси Иккинчи жаҳон урушидан кейин биринчи марта йилига 1 фоиздан камроқ ўсди. Бу ҳақда Financial Times хабар берди.
Жаҳон аҳолиси истиқболлари (БМТ) ҳақидаги ҳисоботида, 2022 йилдан 2050 йилгача 61 мамлакат аҳолисининг камида 1 фоизга қисқариши прогноз қилинмоқда.
Бироқ кўплаб мамлакатларда кекса одамлар улушининг ортиб бораётгани иқтисодий ўсиш ва давлат молиясига таъсир қилиши тахмин қилинмоқда.
Ўсишнинг секинлашишига қарамай, бу йил ҳам дунё аҳолиси сони 8 миллиард кишига етиши, келгуси йилда эса Ҳиндистон энг зич жойлашган мамлакат сифатида Хитойни ортда қолдириши кутилмоқда.
Жорий йилнинг 15 ноябрига қадар 8 миллиардга етадиган дунё аҳолиси 2030 йилда 8,5 миллиардга, 2100 йилда эса 10,4 миллиардга ўсиши мумкин.
Кейин эса қисқариш кузатилади — бу БМТнинг йиллик ҳисоботида прогноз қилинадиган биринчи пасайишдир.
Европа аҳолиси 2020 йилда 744 мингга ва ўтган йили 1,4 миллионга қисқарди. Бу 1950 йилда қайд этилганидан буён қитъадаги энг катта пасайиш бўлиб, ўлимнинг кўпайиши, туғилишнинг камайиши ва пандемия билан боғлиқ аниқ миграциянинг пасайишини акс эттиради.
Осиёда Япония аҳолиси 2010 йилдан бери қисқармоқда, Жанубий Кореяда 2020 йилда камайиш кузатилди, Хитойда эса бу йил ҳам шундай бўлиши кутилмоқда.
Хитой аҳолиси 2040 йилларнинг ўрталарида ҳар йили тахминан 6 миллионга, 2050 йилларнинг охирига келиб эса йилига 12 миллионга қисқариши прогноз қилинмоқда — бу дунёдаги энг катта пасайиш бўлиши мумкин.
Агар сиз аҳоли сони камайиб бораётган мамлакатлар харитасига қарасангиз, у асосан Европанинг марказий қисмидан бошланиб, шарққа Россия ва Хитой бўйлаб Япониягача боради, — деди БМТнинг Иқтисодий ва ижтимоий масалалар департаменти аҳоли бўлими директори Вилмот.
Африка 2020 йилда Осиёни ортда қолдириб, аҳоли ўсишининг асосий манбайига айланди. 2050 йилгача прогноз қилинадиган ўсишнинг ярмидан кўпи асосан Африкада бўлиб, тез ўсиш уларнинг иқтисодий ривожланишига салбий таъсир ўтказиши кутилмоқда.
Изоҳ (0)