Роберт Левандовски «Челси» вариантини ҳам кўриб чиқиши мумкин. Томас Тухель уни Роналдудан кўра афзалроқ деб билади

«Бавария» ҳужумчиси Роберт Левандовски фаолиятини «Челси»да давом эттириши мумкин.

CBS Sport журналисти Бен Жейкобснинг хабар қилишича, ҳужумчи «Барселона» вариант ўхшамаса, Лондон жамоасига ўтиш имкониятларини кўриб чиқади.

Каталонияликлар польшалик ҳужумчини ўз сафига қўшиб олишга ишонмоқда. Левандовскининг ўзи ҳам «Барселона»га ўтиш истагида. Иккала томон музокараларни давом эттирмоқда, ушбу ҳафтада силжиш бўлиши кутилмоқда.

Левандовски ҳар қандай вазиятда ҳам «Бавария»ни тарк этмоқчи. «Челси» эса Рафинья Диас билан бўлган воқеа такрорланишидан хавотирда. «Лидс» футболчи бўйича «кўклар»нинг таклифини қабул қилганди, аммо «кўк-анорранглилар» фаоллик кўрсатиб, бразилияликни ўз томонларига оғдириб олди. Натижада «аристократлар» Рафинья учун курашдан чиққанди.

Агар Роберт вариант реалда амалга ошириладиган бўлса, Томас Тухель буни қўллаб-қувватлайди. Немис мураббийи учун Левандовски «Манчестер Юнайтед» ҳужумчиси Криштиану Роналдудан устунроқ.

«ПСЖ» ҳам Левандовски атрофидаги воқеаларни кузатмоқда. Лекин ушбу трансфер ойнасида польшалик «Барселона»га кўпроқ вақт бермоқда.

33 ёшли ҳужумчи ортда қолган мавсум Бундеслигада 34 та ўйинда майдонга тушиб, 35 та голга муаллифлик қилди.