Европа Иттифоқида рецессия эҳтимоли 45 фоизга ошди — Bloomberg

Европада рецессия хавфи газ тақчиллиги ва инфляциянинг рекорд даражада юқорилиги сабаб ортиб бормоқда. Бу ҳақда Bloomberg хабар берди.

Рецессия — вақтинчалик иқтисодий пасайиш даври бўлиб, бу даврда савдо ва саноат фаолияти қисқаради, одатда икки чоракда ялпи ички маҳсулотнинг пасайиши билан белгиланади.

Иқтисодий пасайиш эҳтимоли экспертлар томонидан 45 фоизга баҳоланмоқда.

Шу билан бирга, уларнинг аксарияти Германия биринчилардан бўлиб ишлаб чиқариш қисқаришига дуч келишини кутмоқда.

Биз рецессияга жорий нефть эмбаргоси ва кўтарилган хом ашё нархлари сабаб бўлади, деб тахмин қиляпмиз. Масалан, Германия иқтисодиёти аллақачон секинлашмоқда, — деди Rabobank таҳлилчиси Эрик-Ян ван Ҳарн.

Европадаги истеъмол нархлари май ойида 8,1 фоизга кўтарилди. Шундан сўнг июнь ойида у йиллик 8,6 фоизга ошиб, тарихдаги энг юқори кўрсаткичга айланди.

Шу билан бирга, экспертлар Европа Марказий банки ставкани жорий йилнинг охиригача йилига 0,75 фоизга, келгуси йилнинг март ойида эса 1,25 фоизга оширишини кутмоқда.

Европа жорий йилнинг иккинчи ярмида енгил рецессияга кириши мумкин, бунинг натижасида Марказий банк аста-секин ставкани оширади, — деди ТD Securities иқтисодчилари.

Аввалроқ кўплаб йирик иқтисодиётли давлатлар келаси йилда рецессияга учраши кутилаётгани ҳақида хабар берилганди.