Ijtimoiy tarmoqlarda Qoraqalpog‘istonda tartibsizliklar vaqtida qurbon bo‘lganlar murdasi, jangovar o‘q tegib jabrlangan chaqaloq haqida turli xabarlar tarqalmoqda. Milliy gvardiya bu kabi xabarlar qanchalik haqiqatga mosligi haqida ma’lumot berdi.
Qayd etilishicha, chet davlatlardagi foydalanuvchilar ijtimoiy tarmoqlarda Qoraqolpog‘iston xalqi nomidan turli feyk xabarlar tarqatishga urinmoqda. Unda aks ettirilgan fototasvirlardan biridagi izohda shifoxonada yotgan chaqaloqning jangovar o‘qdan yaralangani to‘g‘risida aytilgan. Mazkur xabar yuzasidan mas’ul xodimlar tomonidan Respublika shoshilinch tez-tibbiy yordam ilmiy markazi Qoraqolpog‘iston filialiga borib o‘rganilgan. Navbatchi hamshira xirurg Boburbek Tilmurodov tarqatilgan fotosurat va unga berilgan izoh noto‘g‘ri ekanini aytib, bunday jarohat olgan chaqaloq shifoxonada umuman qayd etilmaganini tasdiqlagan.
“Xorijiy messenjerlarda 1—2-iyul kunlari Nukus shahrida sodir bo‘lgan voqealar haqida turli xil ma’lumotlar tarqatilmoqda, foto va videolavhalar e’lon qilinmoqda, tekshirilganda ularning ba’zilari Qoraqalpog‘istonga butunlay aloqasi yo‘q ekani ma’lum bo‘lmoqda.
Videolardagi noma’lum shaxslar yuzlarini yashirib, ovozini o‘zgartirgan holda Qoraqalpog‘iston aholisi nomidan murojaat qilmoqda. Lekin ona tili qoraqalpoq bo‘lgan har bir kishi videodagi odam kuchli urg‘u bilan gapirayotganini aniq ta’kidlaydi.
Hurmatli fuqarolar, jamiyatda vahima qo‘zg‘atmaslik uchun internetda tarqatilayotgan har bir narsaga ishonishga shoshilmang. Bundan tashqari, tasdiqlanmagan ma’lumotlarni tarqatmang”, — deyiladi xabarda.
Shuningdek, tarmoqda Qoraqalpog‘istondagi tartibsizliklar vaqtida o‘ldirilgan fuqarolar murdasi ekani aytilgan surat tarqaldi. Telegram’dagi Qoraqalpog‘istondagi voqealarga oidligi aytilgan ma’lumotlarning rost-yolg‘on ekani haqida ma’lumot beruvchi manbaga ko‘ra, suratda 2022-yil 8-aprelda Ukrainaning Kramatorsk shahriga qilingan raketa hujumi qurbonlari aks etgan bo‘lib, Nukus voqealariga aloqasi yo‘q.
Izoh (0)