Qoraqalpog‘istonda uzoq masofadagi mahallalarda tibbiyot punktlari tashkil etiladi. Bu haqda “Qoraqalpog‘iston Respublikasida 2022–2024-yillarda aholi salomatligini muhofaza qilishni yanada kuchaytirish to‘g‘risida” prezident qarorida belgilandi.
Qarorga muvofiq, 2022-yil yakunigacha:
- birlamchi tibbiy-sanitariya yordami muassasalaridan uzoq masofada joylashgan mahallalarda qo‘shimcha 34 ta mahalla tibbiyot punktlari tashkil etiladi;
- tez tibbiy yordam xizmati 63 ta yangi tez tibbiy yordam maxsus avtotransportlar bilan ta’minlanadi.
- ko‘p tarmoqli markaziy poliklinika va oilaviy poliklinika filiallari negizida 16 ta oilaviy shifokor punktlari tashkil etiladi;
- bolalar orasida ko‘p uchrayotgan kasalliklarni erta aniqlash maqsadida 2–10 yoshli bolalar orasida gelmintoz, 12–15 yoshli qizlar orasida kamqonlik kasalligi bo‘yicha skrining dasturlari joriy etiladi.
2022—2024-yillarda kamida 75 nafar tibbiyot xodimlari nufuzli xorijiy tibbiyot muassasalari va markazlariga malaka oshirish va stajirovka o‘tash uchun yuboriladi.
Qaror bilan Qoraqalpog‘iston Respublikasida 2022—2024-yillarda aholiga ko‘rsatilayotgan tibbiy-sanitariya yordamining sifat va samaradorligini oshirish bo‘yicha qo‘shimcha chora-tadbirlar dasturi ham tasdiqlandi.
Izoh (0)