Toshkent shahar Yunusobod tumanida 3-dekabr kuni 7 nafar shaxs o‘zi ishlagan xonadonga bostirib kirib, 15 ming dollar va Gentra avtomobilini o‘g‘irlab ketgani xabar qilingandi. Ichki ishlar vazirligi qonunbuzarlarga sud hukmi o‘qilganini ma’lum qildi.
O‘sha kuni usta va uning 6 nafar sherigi tumanning “Otchopar” mahallasidagi xonadonlardan biriga o‘zganing mulkini talon-toroj qilish maqsadida kirgan. Ular yuzlariga niqob taqib olgan holda, o‘tkir tig‘li jism bilan qurollangan.
Xonadonda uy egasi bo‘lgan ayolning bir o‘zi ekanidan foydalanib, jinoyatchilar uning qo‘l-oyoqlarini “skotch” yordamida bog‘lab, pichoq bilan tahdid qilgan va moddiy boyliklari qayerda ekanini so‘ragan.
Noma’lum shaxslar yotoqxonadagi seyfni buzib, ichidagi pul mablag‘lari bilan birga olgan. Voqea joyidan yashirinmoqchi bo‘lganda jabrlanuvchining ikki qizi Gentra avtomobilida kelib qolgan. Jinoyatchilar ularni ham majburlab olib kirgan, pichoq bilan tahdid qilib, Gentra’ga o‘tirib, hodisa joyidan yashiringan.
Ushbu jinoiy guruh qisqa vaqt ichida Toshkent shahar IIBB xodimlari tomonidan ushlangan. 44 yoshli Tohir, 36 yoshli Odil, 34 yoshli Bahodir, 31 yoshli Murodilla, Abror, 25 yoshli Azamat, 24 yoshli Muhammad, 22 yoshli Doniyorga Jinoyat kodeksining 164-moddasi (bosqinchilik) va 267-moddasi (transport vositasini olib qochish) bilan ayb e’lon qilinib, qamoqqa olish ehtiyot chorasi qo‘llangan.
Sud hukmiga ko‘ra, sudlanuvchilardan biri Jinoyat kodeksining 164-moddasi 4-qismi “a” bandi va 267-moddasi 2-qismi “b, v” bandlarida nazarda tutilgan jinoyatlarni sodir etganlikda aybdor deb topilgan. Unga 15 yil 8 oy muddatga ozodlikdan mahrum qilish jazosi tayinlangan. Qolgan 4 nafar shaxsga 11 yil qamoq jazosi tayinlangan. Ulardan bir Tojikiston fuqarosi bo‘lgani bois, jazoni o‘tab bo‘lgach O‘zbekiston hududidan chiqarib yuborilishi belgilangan. Shuningdek, sudlanuvchilarning bir nafari 10 yil, ikki nafari 15 yil 6 oy muddatga ozodlikdan mahrum qilish jazosi tayinlangan.
Izoh (0)