Ижтимоий тармоқларда Қорақалпоғистонда тартибсизликлар вақтида қурбон бўлганлар мурдаси, жанговар ўқ тегиб жабрланган чақалоқ ҳақида турли хабарлар тарқалмоқда. Миллий гвардия бу каби хабарлар қанчалик ҳақиқатга мослиги ҳақида маълумот берди.
Қайд этилишича, чет давлатлардаги фойдаланувчилар ижтимоий тармоқларда Қорақолпоғистон халқи номидан турли фейк хабарлар тарқатишга уринмоқда. Унда акс эттирилган фототасвирлардан биридаги изоҳда шифохонада ётган чақалоқнинг жанговар ўқдан яралангани тўғрисида айтилган. Мазкур хабар юзасидан масъул ходимлар томонидан Республика шошилинч тез-тиббий ёрдам илмий маркази Қорақолпоғистон филиалига бориб ўрганилган. Навбатчи ҳамшира хирург Бобурбек Тилмуродов тарқатилган фотосурат ва унга берилган изоҳ нотўғри эканини айтиб, бундай жароҳат олган чақалоқ шифохонада умуман қайд этилмаганини тасдиқлаган.
«Хорижий мессенжерларда 1—2 июль кунлари Нукус шаҳрида содир бўлган воқеалар ҳақида турли хил маълумотлар тарқатилмоқда, фото ва видеолавҳалар эълон қилинмоқда, текширилганда уларнинг баъзилари Қорақалпоғистонга бутунлай алоқаси йўқ экани маълум бўлмоқда.
Видеолардаги номаълум шахслар юзларини яшириб, овозини ўзгартирган ҳолда Қорақалпоғистон аҳолиси номидан мурожаат қилмоқда. Лекин она тили қорақалпоқ бўлган ҳар бир киши видеодаги одам кучли урғу билан гапираётганини аниқ таъкидлайди.
Ҳурматли фуқаролар, жамиятда ваҳима қўзғатмаслик учун интернетда тарқатилаётган ҳар бир нарсага ишонишга шошилманг. Бундан ташқари, тасдиқланмаган маълумотларни тарқатманг», — дейилади хабарда.
Шунингдек, тармоқда Қорақалпоғистондаги тартибсизликлар вақтида ўлдирилган фуқаролар мурдаси экани айтилган сурат тарқалди. Telegram’даги Қорақалпоғистондаги воқеаларга оидлиги айтилган маълумотларнинг рост-ёлғон экани ҳақида маълумот берувчи манбага кўра, суратда 2022 йил 8 апрелда Украинанинг Краматорск шаҳрига қилинган ракета ҳужуми қурбонлари акс этган бўлиб, Нукус воқеаларига алоқаси йўқ.
Изоҳ (0)