O‘zbekistonda mahalliylashtirish darajasining pastligi sabab import xomashyo va materiallarga yuqori darajada qaramlik yuzaga kelmoqda. Bu haqda Senatning 28-yalpi majlisida ma’lum qilindi.
Majlisda mahalliylashtirish dasturi asosida 2021-yilda amalga oshirilgan ishlar muhokama etilgan. Muhokamalar jarayonida amalga oshirilgan loyihalar doirasida suv tashuvchi yuk mashinasi, burg‘ilash nasosi, kichik quvvatli elektr motorlar, ultratovushli suv o‘lchagichlar singari mahsulotlar ishlab chiqarilishi yo‘lga qo‘yilgani qayd etildi.
Shuningdek, mahalliylashtirish dasturini ta’minlashda ayrim muammolarga ham e’tibor qaratilgan. Qayd etilishicha, mahalliylashtirish darajasining pastligi import xomashyo va materiallarga yuqori darajada qaramlikni yuzaga keltirib chiqarmoqda. Natijada mahsulot narxi oshib, aholining xarid qobiliyatiga salbiy ta’sir ko‘rsatmoqda.
Jumladan, 2021-yilda mahalliylashtirish dasturiga kiritilgan 1,9 trillion so‘mlik 115 ta loyiha ishga tushirilmagan, 203 ta loyiha bo‘yicha mahalliy mahsulotlarni ishlab chiqarish rejasi bajarilmagan.
“O‘zavtosanoat” AJ, Farmatsevtika tarmog‘ini rivojlantirish agentligi, “O‘zmaxsusmontajqurilish” AK, “O‘zto‘qimachiliksanaot” uyushmasi, “O‘zeltexsanoat” uyushmasining, hududlar kesimida esa Xorazm, Qashqadaryo, Andijon, Samarqand viloyatlarining mahalliylashtirish rejalari ijrosi to‘liq ta’minlanmagan.
Bundan tashqari, www.cooperation.uz elektron portali orqali qonunchilikka zid ravishda to‘g‘ridan to‘g‘ri shartnomalar tuzish, yuqori narxlarda xaridlarni amalga oshirish, mahalliy ishlab chiqaruvchi subyektlar bo‘lmagan hamda import tovarlarini elektron kooperatsiya birjasida sotish holatlari aniqlangan.
Muhokama yakunida iqtisodiyotning ishlab chiqarish sohasida mahalliylashtirish dasturlari ijrosi yuzasidan hukumatga parlament so‘rovi yuborish to‘g‘risida Senat qarori qabul qilingan.
Shavkat Mirziyoyev mart oyida bo‘lib o‘tgan videoselektor yig‘ilishida mas’ullarga 283 turdagi import mahsulotini mahalliylashtirish topshirig‘ini bergandi.
Izoh (0)