Buxoro tumanida yashovchi fuqaro ukasiga tegishli yer maydonini yashirin ravishda 120 ming dollarga pullab, 20 ming dollarni oldindan olayotganda qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, fuqaro Sh.A. ukasi J.A.ning nomida bo‘lgan MCHJga qarashli 7 gektar yer maydonini o‘zboshimchalik bilan sotishga uringan. U hamqishlog‘i F.N.ning ishonchiga kirib, yer maydoni aslida o‘ziga tegishli ekanini bildirgan. Va undan bu yer maydonini sotishi evaziga 120 ming dollar so‘ragan. Biroq F.N. holatni surishtirgan va akaning o‘z ukasiga nisbatan firibgarlik qilayotganini anglab yetgan. Yer sotuvchi aka esa xaridorga yerni tezroq olishini, yo‘qsa boshqa talabgor chiqayotganini aytgan.
F.N. esa holat yuzasidan huquq-tartibot organlariga xabar bergan.
Shu kuni Bosh prokuratura huzuridagi departamentning viloyat boshqarmasi hamda viloyat IIB tezkor guruhi tadbir o‘tkazgan. Yer sotuvchi aka xaridordan kelishilgan 120 ming dollarning 20 ming dollarini oldindan olayotgan vaqtda qo‘lga olingan.
Mazkur holat yuzasidan aybdorga nisbatan Jinoyat kodeksining 168-moddasi ( firibgarlik) bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)