Navoiy viloyatining Xatirchi tumanida 30 boshdan ziyod qo‘yni noma’lum hayvon bo‘g‘izlab ketgani haqida xabarlar tarqaldi. Viloyat Ekologiya boshqarmasi holat yuzasidan rasmiy ma’lumot berdi.
Ma’lum qilinishicha, 9-iyuldan 10-iyul kuniga o‘tar kechasi Xatirchi tumani “Yangirabod” MFYda istiqomat qiluvchi fuqarolarga tegishli bo‘lgan qo‘y-echkilarga shoqol (chiyabo‘ri) tomonidan hujum qilingan.
Mazkur hodisaning kelib chiqish sabablari tuman IIB, tuman veterenariya bo‘limi, tuman SEOM bo‘limi hamda tuman obodonlashtirish bo‘limi mas’ul xodimlari tomonidan o‘rganilmoqda. Ayni paytda tuman veterenariya bo‘limi xodimlari tomonidan 15 bosh qo‘y-echkilarga nisbatan davolash ishlari olib borilmoqda.
“Shu o‘rinda fuqarolarga ortiqcha vahima hamda xavotirga berilmasliklarini ta’kidlab o‘tamiz. Hozirda shoqol (chiyabo‘ri) ni tutish uchun barcha ta’sir choralari ko‘rilgan bo‘lib, mazkur holat yuzasidan tuman IIB xodimlari tomonidan qo‘shimcha surishtiruv ishlari olib borilmoqda”, — deyiladi xabarda.
Izoh (0)