Oliy va o‘rta maxsus ta’lim vazirligi qoraqalpog‘istonlik abituriyentlar uchun qabul muddati uzaytirilishini ma’lum qildi.
Vazirlik 10-iyul OTMning chet tilidan kasbiy (ijodiy) imtihon o‘tkaziladigan ta’lim yo‘nalishlari hamda akademik litseylarga qabulning so‘nggi kuni ekanini, 2022/2023-o‘quv yili uchun oliy ta’lim muassasalari hamda kasb-hunar maktablariga onlayn hujjat topshirish jarayonlari 20-iyul kuniga qadar davom etishini eslatib o‘tgan.
“Hozirda Qoraqalpog‘iston hududida internet tizimida ayrim texnik nosozliklar tufayli hujjatlarni onlayn topshirishda uzilishlar kuzatilmoqda.
Ammo xavotirga o‘rin yo‘q. Bu jarayon hukumat tomonidan to‘liq nazoratga olingan bo‘lib, hozirda hujjat topshirishga ulgura olmagan qoraqalpog‘istonlik yoshlar uchun onlayn ro‘yxatdan o‘tish muddati uzaytirilishi kutilmoqda”, — deyiladi xabarda.
Qayd etilishicha, ushbu masala tez orada ijobiy yechimini topadi va bu haqidagi ma’lumot qoraqalpog‘istonlik abituriyentlar hamda ularning ota-onalariga (Beeline, Uzmobile, Ucell, UMS, Perfectum mobile) SMS xabar tarzida, shuningdek, hududiy telekanallar orqali yetkaziladi.
Izoh (0)