Ijtimoiy tarmoqlarda Samarqand va Past Darg‘om tumanlarini bir-biriga bog‘lovchi daryo o‘zanida yong‘in sodir bo‘lgani to‘g‘risida xabar tarqaldi. Viloyat Ekologiya va atrof-muhitni muhofaza qilish boshqarmasi holat yuzasidan ma’lumot berdi.
Samarqand tumani Ekologiya va atrof-muhitni muhofaza qilish bo‘limi davlat inspektorlari tomonidan olib borilgan o‘rganish ishlarida ma’lum bo‘lishicha, 8-iyul kuni tushdan so‘ng Qoradaryoning Samarqand tumani “Zaxlik” mahallasi hududidan oqib o‘tuvchi qirg‘oq mintaqasida yovvoyi holda o‘sadigan yulg‘unzor noma’lum shaxslar tomonidan yoqib yuborilgan.
Holat tuman FVB yong‘in-qutqaruvchilari tomonidan tezkor tartibda bartaraf etilgan. Aniqlanishicha, yong‘in natijasida 4 gektar yer maydonidagi buta va yulg‘unlar yongan.
Qayd etilishicha, hozirda Samarqand tumani Ekologiya va atrof-muhitni muhofaza qilish bo‘limi va tegishli mutasaddi tashkilotlar tomonidan holat yuzasidan qonunda belgilangan tartibda surishtiruv va o‘rganish ishlari olib borilmoqda.
Izoh (0)