Ijtimoiy tarmoqlarda Buxoroda chupakabra yirtqich hayvonlari paydo bo‘lib, odamlarning o‘ndan ortiq qo‘ylarini bo‘g‘izlab ketayotgani haqida xabar tarqaldi. “Daryo” muxbiri xabarga aniqlik kiritdi.
Ma’lum bo‘lishicha, holat viloyatning Romitan tumanidagi “Chilong‘u” mahalla fuqarolar yig‘inidagi Suspatta qishlog‘ida sodir bo‘lgan.
Mahalla fuqarolar yig‘ini raisi Nutfullo Saidovning “Daryo”ga ma’lum qilishicha, haqiqatan ham hududda bir dona chupakabra paydo bo‘lgan. Biroq u aholining mol-hol va qo‘y-qo‘zilariga ziyon yetkazishga ulgurmagan.
“Suspatta qishlog‘i Gazli cho‘li hududiga yaqin manzilda joylashgan. Cho‘l zona bo‘lgani uchun u yerda shoqol, daydi itlar, chiyabo‘ri, tulki, yumronqoziq va boshqa hayvonlar bor. Mahalla bolalari chupakabraning shu manzildagi 2-sonli kasb-hunar maktabi yaqinida yurganini ko‘rib qolgan. Sergaklik bilan mol-hollariga ziyon yetkazmasligi uchun uni quvlashga tushishgan. Chupakabra savdo do‘konining yerostiga kirib ketgan. U juda ham ozg‘in va kasal holatda bo‘lgan. Haqiqatan ham uni mahallamiz odamlari o‘z xavfsizliklari uchun o‘ldirishgan”, — deydi Nutfullo Saidov.
Mahalla raisining bildirishicha, bir nechta yovvoyi hayvonlarning aholi qo‘yini sudrab ketayotgani tasvirlangan videodagi hayvonlar chupakabra emas, balki daydi itlar hisoblanadi. Ular chupakabra hayvoni paydo bo‘lishidan ilgari aholining qo‘y-qo‘zilariga hujum qilgan. Bu haqda tuman Ekologiya va atrof-muhitni muhofaza qilish bo‘limiga ham ma’lumot bergan.
“Chupakabra Xorazm cho‘llari tomonidan Gazli cho‘liga kelib qolgan bo‘lishi mumkin. Izlanishlarga qaramay, cho‘l zonasining ancha uzoq hududlarigacha boshqa birorta chupakabra topilmadi”, — dedi mahalla raisi.
Izoh (0)