AQSHning Oklaxoma shtati Medford shahridagi Oneok gaz kompaniyasi zavodida portlash sodir bo‘ldi. Bu haqda News on 6 mahalliy sherif idorasiga tayanib, xabar berdi.
Xabarga ko‘ra, hodisa 9-iyul kuni sodir bo‘lgan, portlashdan so‘ng binoda yong‘in boshlangan. Korxonaning barcha xodimlari evakuatsiya qilindi, dastlabki ma’lumotlarga ko‘ra, portlash qurbonlari yo‘q, deyiladi kompaniya xabarida.
Rasmiylar yaqin atrofdagi yo‘llarni to‘sib qo‘yishga majbur bo‘lgan, sherif idorasi zavoddan ikki milya radiusda (taxminan 3,2 km) joylashgan shaharning barcha aholisini maktab binosiga evakuatsiya qilishni so‘ragan. Fox News telekanalining aniqlik kiritishicha, odamlarni shahar cherkovi va ko‘rgazma majmuasi qabul qilmoqda. Rasmiylar nima sababdan aholidan boshpanaga o‘tishni so‘ragani haqida hech bir telekanal xabar bermadi.
Fox News xabariga ko‘ra, zavod shaharning o‘zida emas, balki uning chekkasida joylashgan.
Oneok kompaniyasi 1906-yilda Oklaxoma shtatida tashkil etilgan, u gaz quvurlarini yotqizish va suyultirilgan gazni tashish bilan shug‘ullanadi.
Izoh (0)