Angola sobiq prezidenti va eng badavlat rossiyalik ayolning otasi vafot etdi

Angola sobiq prezidenti Joze Eduardu dush Santush Ispaniyada 79 yoshida vafot etdi. Bu haqda mamlakat ma’muriyati Facebook’dagi sahifasi orqali ma’lum qildi, deb yozadi “RBK”.

U uzoq davom etgan kasallikdan keyin Barselonadagi kasalxonada vafot etdi. Angolada milliy motam e’lon qilindi.

Santush o‘limidan avval ikki hafta mobaynida koma holatida yotgan. Sobiq prezident Barselonadagi uyida baxtsiz hodisani boshidan o‘tkazgach, o‘pka yetishmovchiligi tashxisi bilan kasalxonaga joylashtirilgan edi.

Aynan nima yuz berganiga aniqlik kiritilmayapti, ammo Santushning qizlaridan biri Chize dush Santush otasini o‘ldirish maqsadida uyushtirilgan fitna haqida gapirgan.

U sobiq prezidentning shaxsiy shifokori Joao Afonsu va Santushning bevasi Ana Paulani otasining salomatligi yomonlashishiga olib kelgan harakatlarni qasddan sodir etganlikda aybladi, ular, go‘yoki, Santush Angolada katta ta’sirga ega bo‘lgan siyosatchi sifatida 24-avgustda bo‘lib o‘tadigan saylovlarda muxolifatni qo‘llab-quvvatlashidan xavfsiragan.

Catalan News 4-iyul kuni Chize politsiyaga ariza berib, otasiga uyushtirilgan ehtimoliy suiqasdni tekshirishni so‘raganini yozgandi. Shuningdek, u hukumatdan shifokor va tibbiy xodimlar tomonidan xizmat majburiyatlariga sovuqqonlik bilan munosabatda bo‘lish, salomatlikka ehtiyotsizlik oqibatda zarar yetkazish va shaxsiy sirni oshkor qilish bilan bog‘liq holat yuz bergan-bermagani yuzasidan surishtiruv o‘tkazishni so‘ragan.

Sobiq prezidentning qizi fikricha, so‘nggi yillarda Angola hukumati tomonidan unga biriktirilgan shifokorlar asta-sekinlik bilan uning sog‘lig‘ini yomonlashtirgan, oqibatda Santushni koma holatiga kiritish zaruriyati yuzaga kelgan. Catalan News yozishicha, shifokorlar davolashni davom ettirib bo‘lmasligi tufayli, prezidentni hayotni saqlab turish qurilmalaridan uzib qo‘yishni talab qilgan.

Dush Santush 1979-yildan 2017-yilgacha Angola prezidenti lavozimini egallagan.

U 1960-yillarda Ozarbayjon neft va kimyo institutida o‘qigan. Prezidentligi davrida u SSSR ko‘magidan foydalangan va mamlakatga bir necha marta tashrif bilan kelgan. Leonid Brejnevdan boshlab dush Santush Konstantin Chernenkodan tashqari (Angola prezidenti uning dafn marosimiga borgan) barcha sovet yetakchilari (keyinroq Rossiya yetakchilari bilan ham) bilan uchrashgan.

Dush Santushning birinchi rafiqasi SSSR fuqarosi Tatyana Kukanova bo‘lgan. Ularning yagona qizi Izabel dush Santush Afrikadagi birinchi milliarder ayolga aylangan.

2016-yilda otasi uni Angolaning eng yirik Sonangol neft kompaniyasiga rahbar etib tayinladi. 2017-yilda Izabel bu lavozimdan bo‘shadi va mamlakatni tark etdi. 2019-yilda u turmush o‘rtog‘i, Kongo Demokratik Respublikasi fuqarosi va kolleksioner tadbirkor Sindika Dokolo bilan birga Dubayga ko‘chib ketdi.

Forbes ma’lumotlariga ko‘ra, 2020-yilda sobiq prezident qizining boyligi 2,2 milliard dollarni tashkil etgan, natijada u Afrikadagi eng badavlat ayolga aylangan. Bundan tashqari, u Rossiya fuqarosi bo‘lgani sababli, eng badavlat rossiyalik ayol deb ham hisoblanadi.