Dunyoda so‘nggi ikki hafta ichida COVID-19 bilan kasallanish darajasi qariyb 30 foizga o‘sdi, bu omikron-shtammning mavjud kenja turlari tarqalishi bilan bog‘liq, biroq yangi variantlar ham aniqlanmoqda. Bu haqda Jahon sog‘liqni saqlash tashkiloti (JSST) bosh direktori Tedros Adanom Gebreyesus matbuot anjumanida ma’lum qildi, deb yozadi “RBK”.
“Global nuqtai nazardan aniqlangan holatlar soni so‘nggi ikki hafta ichida qariyb 30 foizga o‘sdi… Yevropa va Amerikada holatlarning aksariyati omikron-shtammning BA.4 va BA.5 kenja turlari hissasiga to‘g‘ri keladi”, — deya aniqlik kiritdi u.
Hindistonda, Gebreyesusning so‘zlariga ko‘ra, omikronning yana bir kenja turi BA.2.75 aniqlangan, uning ustidan kuzatuv olib borilmoqda.
Pandemiya bilan bog‘liq joriy vaziyatga tegishli bo‘lgan asosiy xususiyatlar qatorida JSST rahbari quyidagilarni qayd etdi:
- ko‘pchilik mamlakatlarda koronavirus infeksiyasiga nisbatan test olish darajasi keskin pasayib ketdi;
- COVID-19 ga qarshi yangi dorilar kambag‘al mamlakatlarga yetib bormayapti, shu munosabat bilan Gebreyesus ulardan foydalanish imkoniyatini oshirishga chaqirdi;
- vaksinatsiya kasallikning og‘ir kechishi va o‘lim bilan tugashi oldini olishda “haqiqatda samarali” vosita bo‘lib qolmoqda, shuning uchun buster vaksinatsiyani o‘tkazish muhim, ayniqsa, xavf guruhidagi shaxslar (keksalar, surunkali kasalliklari norlar, tibbiyot xodimlari) uchun;
- pandemiyaning har bitta to‘lqinidan keyin boshdan o‘tkazilgan kasallik asoratlariga ega odamlar tobora ko‘paymoqda, bu kasallanib o‘tganlarning o‘zlariga ham, sog‘liqni saqlash tizimi, iqtisodiyot va umuman jamiyatga ham ta’sir qiladi.
5-iyul holatiga ko‘ra, butun dunyoda kasallanganlar soni 550 million kishidan oshdi.
O‘zbekistonda 5-iyul kuni 87 kishida koronavirus qayd etilib, mamlakatda pandemiya boshidan beri koronavirusga chalingani rasman tasdiqlanganlar soni 241 283 nafarga yetdi.
Izoh (0)