Andijon viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Otabek Tursunov ishdan olingani aytilmoqda. Bu haqda manbalariga tayanib “Daryo” muxbiri xabar bermoqda.
Ta’kidlanishicha, viloyat hokimi Shuhrat Abdurahmonov 2022-yilning 27-iyun kuni o‘tkazilgan hokimlik soatida Otabek Tursunov faoliyatida kamchilikka yo‘l qo‘ygani haqida aytib, egallab turgan lavozimidan olinganini ma’lum qilgan.
Viloyat hokimligi axborot xizmati mas’ullari Tursunovning ishdan olingani bo‘yicha hozircha rasmiy ma’lumot yo‘qligini, biroq u o‘n kundan buyon ishga chiqmayotganini bildirgan.
Iqtisodiy taraqqiyot va kambag‘allikni qisqartirish bosh boshqarmasidagi manba Otabek Tursunov lavozimidan ozod qilishlarini so‘rab ariza yozib berganligini, ammo natijasi haqida ma’lumot yo‘qligini ta’kidlab, Tursunov ayni paytda mehnat ta’tilida ekanligini ma’lum qilgan.
“Daryo”ning viloyat hokimligidagi manbalariga ko‘ra, Tursunovning ishdan olinishiga viloyatda oilaviy tadbirkorlikni rivojlantirish dasturlari doirasidagi muammoli kreditlar qoldig‘i yuqoriligi, muammoli kreditlarni undirish va ajratilgan kreditlardan samarali foydalanishda kamchiliklarga yo‘l qo‘yilganligi sabab qilib ko‘rsatilgan.
Otabek Tursunov 2021-yilning fevral oyidan buyon ushbu lavozimda faoliyat yuritib kelayotgan edi.
Izoh (0)