Andijon viloyatining Marhamat tumanida hokim yordamchisi 16-aprel kuni o‘z joniga qasd qilgani haqida xabar berilgan edi. Viloyat prokuraturasi holat yuzasidan qo‘shimcha ma’lumot berdi.
Unda bayon qilinishicha, marhumning otasi M.M. o‘g‘lining o‘limi yuzasidan tuman hokimligi tomonidan e’lon qilingan axborotning yolg‘onligi xususidagi murojaati ijtimoiy tarmoqlarda tarqalgan.
Tuman hokimligi axborotida 2022-yil 11-yanvardan boshlab “Polvontosh” mahallasida hokim yordamchisi lavozimida faoliyat yuritib kelgan M.F. avval dadasi og‘ir xastalikka chalingani, so‘ngra onasi og‘ir xastalik bilan kasallanib, vafot etgandan so‘ng ishga sovuqqonlik bilan qaragani aytilgan.
Ta’kidlanishicha, oilasida yuzaga kelgan kelishmovchiliklar sababli spirtli ichimliklarga ruju qo‘ygan. 2022-yil mart oyi davomida bir necha bor ogohlantirilishiga qaramasdan, ichkilik ichishni davom ettirgan. 2022-yil 1-aprel kuni o‘z ixtiyori bilan ishdan bo‘shash to‘g‘risida ariza bergan. Yashash uyida o‘zini osib, joniga qasd qilishi lavozimidan bo‘shaganidan so‘ng sodir bo‘lgan.
Andijon viloyati prokuraturasi xabarida aytilishicha, holat yuzasidan Marhamat tuman prokuraturasi tomonidan tergovga qadar tekshiruv harakatlari o‘tkazilib, uning badanida bo‘ynidagi osilishdan qolgan strangulyatsion egat ko‘rinishidagi izlardan tashqari biror-bir tan jarohatlari aniqlanmagan.
O‘tkazilgan tekshiruv natijasida sobiq hokim yordamchisining o‘z joniga qasd qilgani holatida o‘zga shaxslarning jinoyat alomatlari aniqlanmaganligi sababli tuman prokuraturasi tomonidan jinoyat ishi qo‘zg‘atishni rad qilish haqida qaror qabul qilingan.
Izoh (0)