AQSHda 4-iyul – Mustaqillik kuni oldidan ko‘plab aviareyslar bekor qilindi, shu kuni minglab amerikaliklar mamlakat bo‘ylab sayohat uyushtiradi, ammo ichki reyslar amalga oshirilmayapti. Bu haqda New York Times xabar bergan.
Oxirgi bir necha kun ichida AQSHda 5 mingdan ziyod aviareys bekor qilingan, bunga bir qator salbiy omillar, xususan, texnik nosozliklar, xodimlar yetishmovchiligi, dasturiy ta’minotdagi muammolar, Janubiy Karolinada sohilida kuzatilgan tropik bo‘ron sabab bo‘lgan.
Ko‘plab aeroportlar bekor bo‘lgan reyslarni kompensatsiya qiladigan yo‘nalishlarni kutayotgan yoki yangi qo‘shimcha reyslar orqali manzilga yetib olishni maqsad qilgan yo‘lovchilar bilan to‘lgan. 2-iyuldan 3-iyulga o‘tar kechasi mamlakatda bir yo‘la 600 ta samolyot reysi bekor qilingan.
Ayniqsa, Nyu-Yorkdagi Jon Kennedi nomidagi aeroport hamda “Nyuark Liberti”da, shuningdek Texas shtatidagi Dallas aeroportida vaziyat ancha og‘ir. AQSHdagi eng katta aviakompaniyalar kechikishlar va bekor qilingan reyslarga noqulay ob-havo, dispetcherlik xizmatining dasturiy ta’minoti ishi sabab ekanini qayd etib, yo‘lovchilarning uchish muddatini boshqa sanaga o‘tkazgan holda ularga qo‘shimcha to‘lov yoki komissiya bermoqchi emas.
OAVda keng tarqalgan bir holatda Michigandan Minnesotaga uchadigan Delta kompaniyasi reysida overbuking kuzatilgan va kompaniya mazkur reysda o‘z o‘rnidan voz kechgan yo‘lovchilarning har biriga 10 ming dollar taklif qilgan. Guvohlarning so‘zlariga ko‘ra kompaniya ushbu tashabbusni sakkizta joy bo‘shatishni ko‘zlab amalga oshirgan, yakunda to‘rt yoki besh nafar odam ushbu taklifni qabul qilgan.
Delta rahbariyati reyslarning bekor qilinishi yoki kechiktirilishi yuzasidan mijozlarda kechirim so‘ragan. Kompaniya bosh direktori Ed Bastian korporativ blogida Delta’ning sanoatda yetakchi bo‘lish uchun yillar sarflagani, ammo bunday tarzda ko‘plab reyslarning bekor qilinishi, kechiktirilishi yoki boshqa salbiy holatlar kompaniya obro‘siga yomon ta’sir ko‘rsatishini qayd etgan.
Izoh (0)