Qoraqalpog‘iston Jo‘qorg‘i Kengesi raisi Murat Kamalov lavozimini tark etgani rad etildi

Ijtimoiy tarmoqlarda Qoraqalpog‘iston Respublikasi Jo‘qorg‘i Kengesi Raisi Murat Kamalov lavozimini tark etgani haqida xabarlar tarqalmoqda.

“Nigoh” Telegram-kanali o‘z manbalariga tayanib, ushbu xabar haqiqatga to‘g‘ri kelmasligini ma’lum qildi.

Ma’lumot uchun, Qoraqalpog‘iston Jo‘qorg‘i Kengesining 2-oktabr kuni bo‘lgan navbatdan tashqari 8-sessiyasida Murat Kamalov Qoraqalpog‘istonning yangi rahbari etib saylangandi.

U 2020-yil 7-avgustidan beri Prezident huzuridagi Orolbo‘yi xalqaro innovatsiya markaziga direktorlik qilgan. Undan avval, 2018-yildan boshlab, Davlat xavfsizlik xizmatining Qoraqalpog‘iston bo‘yicha boshqarmasiga boshliq bo‘lgan (2020-yil avgustida Qoraqalpog‘iston DXXga yangi boshliq tayinlangani ma’lum bo‘lgan edi). Maxsus xizmat maktabini tamomlab, mehnat faoliyatini ham 1977-yili Davlat xavfsizlik qo‘mitasi (hozirgi Davlat xavfsizlik xizmati)da boshlagan bo‘lsa-da, Kamalov 1987-yildan to 2018-yilgacha boshqa sohalarda faoliyat yuritgan.

Jumladan, 1987—1990-yillarda O‘zbekiston Fanlar akademiyasida kichik ilmiy xodim, 1990—1991-yillarda “Konsul” diplomatik vakolatxonalarga xizmat ko‘rsatish tashkilotida bosh muhandis, 1991—1996-yillarda Qoraqalpog‘iston Vazirlar Kengashi huzuridagi “Karakalpakintorg” xorijiy mamlakatlar bilan ishbilarmon hamkorlik uyushmasining Toshkentdagi vakolatxonasida direktor, 1996—2010-yillarda Toshkentdagi Stellor unitar korxonasida boshliq (ochiq manbalardagi ma’lumotlarga ko‘ra, korxona ulgurji savdo bilan shug‘ullangan), 2010—2018-yillarda “Huquqiy biznes va konsalting agentligi” advokatlik byurosida maslahatchi lavozimlarida ishlagan.