Daniya poytaxtidagi savdo markazida yuz bergan otishmadan keyin uch kishi halok bo‘ldi va yana uch kishi og‘ir ahvolda qolmoqda, deb yozadi “Interfaks”.
Kopengagen politsiyasi inspektori Seren Tomassen aniqlik kiritishicha, qurbonlarning uchalasi ham erkak kishi.
Uning so‘zlariga ko‘ra, otishma sodir etganlikda gumonlanib, 22 yoshli daniyalik hibsga olingan. Tomassenning qo‘shimcha qilishicha, politsiya surishtiruvni davom ettirmoqda, ammo hujumga yana kimdir aloqador bo‘lganini bildiruvchi belgilar yo‘q.
Hodisa 3-iyul kuni kechqurun Kopengagen janubidagi Field’s savdo markazida sodir bo‘ldi. Otishma chog‘ida Sunset Boulevard restoranining yuqori qavatida bo‘lgan xo‘randalardan biri TV2 telekanaliga ma’lum qilishicha, kamida uch marta o‘q ovozini eshitgan va savdo zalidan yugurib chiqayotgan odamlarni ko‘rgan. Bino ichkarisida bo‘lgan tashrifchilardan biri olgan 14 soniyali videoda o‘q ovozlari va odamlar baqiriqlarini eshitish mumkin.
Jinoyat terakt sifatida tekshirilmoqda, shaharda inqirozga tayyorgarlik rejimi e’lon qilindi.
Field’s savdo markazi Kastrup aeroporti yaqinida joylashgan. Telekanal ma’lumotlariga ko‘ra, unga juda yaqin joyda Royal Arena stadioni bo‘lib, u yerda 3-iyul kuni britaniyalik qo‘shiqchi Garri Staylzning konserti bo‘lib o‘tishi kerak edi. Shahar politsiyasi xavfsizlik nuqtai nazaridan tadbirni bekor qilishni talab qildi.
Izoh (0)