Rossiya bosh vaziri Mixail Mishustin imzolagan qarorga muvofiq, Rossiya Yevropa Kengashining qisman va kengaytirilgan qisman bitimlaridagi ishtirokini to‘xtatdi, deb yozadi Meduza.
Shu tariqa, 16-martdan Rossiyaning sakkizta kelishuvdagi ishtiroki to‘xtatilgan, bular:
- Narkotiklar va tobelik bo‘yicha xalqaro hamkorlik guruhi (“Pompidu guruhi”, avvalgi nomi Narkotiklarni suiiste’mol qilish va ularning noqonuniy aylanmasiga qarshi kurashish bo‘yicha hamkorlik guruhi);
- 1990-yilgi, huquq orqali demokratiya uchun Yevropa Komissiyasini ta’sis qiluvchi qisman kelishuv;
- Yevropa Kengashining tabiiy ofatlar va texnologik halokatlarni prognoz qilish, oldini olish va bunday hollarda yordam ko‘rsatish bo‘yicha qisman ochiq kelishuvi;
- Birgalikda kino ishlab chiqarish hamda kinematografik va audiovizual asarlar prokati bo‘yicha Yevropa ko‘mak fondi (“Yevrimaj”);
- Yevropa audiovizual observatoriyasi;
- Yevropa Kengashining sport bo‘yicha kengaytirilgan qisman kelishuvi;
- Yevropa Kengashining madaniy yo‘nalishlar haqidagi kengaytirilgan qisman kelishuvi;
- Yevropa Kengashining “Yevropada tarixni o‘qitish bo‘yicha observatoriya” kengaytirilgan qisman kelishuvi.
Fevralda Yevropa Kengashi Rossiya tomonidan DXR va LXR mustaqilligi tan olinishini, shuningdek, Ukraina bostirib kirilishini qoraladi. Yevropa Kengashi vazirlar qo‘mitasi Rossiyaning tashkilotdagi vakilligini to‘xtatib qo‘ydi va uni qo‘mita, Parlament Assambleyasi va Yevrokengashning boshqa organlari faoliyatida qatnashish huquqidan mahrum qildi.
Bunga javoban, 15-mart kuni Rossiya Yevropa Kengashidan chiqish jarayonini boshladi. Shundan keyin Rossiyada Inson huquqlari bo‘yicha Yevropa sudining 15-martdan keyin qabul qilingan qarorlarini ijro etmaslik to‘g‘risida qonun qabul qilindi. Inson huquqlari bo‘yicha Yevropa sudi 16-sentabrga qadar Rossiyani sud jarayonlarida tomon deb hisoblashda davom etadi.
Izoh (0)