Namanganda Suriyadagi jangarilar safiga qo‘shilmoqchi bo‘lgan ayol ikkinchi marta to‘xtatib qolindi

Namangan viloyatida tug‘ilgan fuqaro Suriyadagi jangarilar safiga qo‘shilishni rejalashtirib yurgani aniqlandi. Ichki ishlar vazirligi xabar qildi.

Qayd etilishicha, fuqaro E.M. (1977-yilda tug‘ilgan) 2019—2021-yillarda Turkiyaning Istanbul shahrida bo‘lib, Sodiq Samarqandiyning madrasalarida ta’lim olgan. Oqibatda u ekstremistik va terrorchilik tashkilotlar g‘oyalari ta’siriga tushib, Suriyaga borish va u yerdagi jangarilardan biriga turmushga chiqishni rejalashtirgan.

Shu maqsadda fuqaro E.M. 2021-yilning mart oyida Turkiyadan doimiy yashash manziliga qaytib kelib, 3 nafar farzandini o‘zi bilan birga olib, Qirg‘iziston—Turkiya—Suriya yo‘nalishida harakatlanayotgan vaqtida chegara hududida to‘xtatilgan hamda doimiy yashash manziliga qaytarilgan.

Olib borilgan tushuntirish ishlariga qaramay, fuqaro E.M. o‘zining Suriyadagi jangarilar safiga qo‘shilish maqsadidan voz kechmagan hamda u yerdagi hamfikrlari bilan ijtimoiy tarmoqlar orqali yozishmalarni davom ettirib kelgan.

Shuningdek, u internet tarmog‘ida bir qator guruhlar tashkil qilib, guruh a’zolari orasida aqidaparastlik va ekstremistik mazmundagi materiallarni tarqatgan hamda Suriyadagi jangarilarga moddiy yordam berishga targ‘ib qilgan.

Ta’kidlanishicha, E.M. jinoiy maqsadiga erishish yo‘lida balog‘at yoshidagi qizi E.X.ni 2022-yilning mart oyida Turkiyaga jo‘natib, u yerdagi ekstremistik va terrorchilik tashkilotlari rahnamolarining qo‘liga ta’lim olishi uchun topshirgan.

Holat yuzasidan unga nisbatan Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) bilan jinoyat ishi qo‘zg‘atilgan.