Markaziy bankning Finlit loyihasi tomonidan mikroqarz olish tartibi haqida qo‘llanma ishlab chiqildi.
Mikroqarz banklar va mikrokredit tashkilotlari tomonidan to‘lovlilik, muddatlilik va qaytarish shartlari asosida faqat jismoniy shaxslarga beriladi.
Uning miqdori qarz oluvchining to‘lov qobiliyatiga bog‘liq bo‘lib, 50 mln so‘mdan oshib keta olmaydi.
Mikroqarz O‘zbekiston milliy valyutasida naqd yoki bank kartasiga nadq pulsiz ko‘rinishda o‘tkaziladi. Bank kartasi esa debet yoki kredit kartasi bo‘lishi mumkin.
Debet karta – tovar va xizmatlarga haq to‘lash, o‘tkazmalarni amalga oshirish va bankomatdan naqd pul yechish imkoniyatini beruvchi kartadir.
Kredit karta - tovar va xizmatlarga haq to‘lash uchun, mijozga bank bilan tuzilgan shartnoma tariflariga ko‘ra taqdim qilingan bank mablag‘lari hisobiga to‘lovlarni amalga oshirish imkoniyatini beruvchi kartadir.
Naqd pulsiz shaklda olingan mikroqarz, bank kartasidan foydalanish orqali tovar, ish va xizmatlar uchun to‘lash imkonini beradi.
Shu bilan birga, bank tomonidan bank kartasiga mablag‘larni o‘tkazish orqali beriladigan mikroqarz har bir kishi uchun uning o‘rtacha oylik daromadi, kredit tarixi, va boshqa omillar asosida alohida hisoblanib bank tomonidan belgilangan limit doirasida beriladi.
Bunda foizlar ruxsat etilgan limit emas, faqat haqiqatda ishlatilgan mablag‘lar bo‘yicha hisoblanib, qarzning o‘z vaqtida qaytarilishi kredit xizmatini qayta tiklash imkonini beradi.
Shu bilan birga, mikroqarzning limiti debet kartasi uchun overdraft shaklida ochilishi mumkin, bu uning egasiga o‘z va qarz mablag‘larini ishlatish imkonini beradi.
Overdraft — bu bankdan qisqa muddatga kichik summani qarzga olish imkoniyati. Agar overdraft ulangan bo‘lsa, hisobda mavjud bo‘lgan pullardan ko‘proq pul ishlatish mumkin.
Shu bilan birga, overdraft banklar tomonidan chiqarilgan debet kartalariga asosan ish haqini to‘lash yoki pensiyani o‘tkazib berish uchun beriladi.
Debet kartasiga mablag‘larni o‘tkazish yo‘li bilan berilgan mikroqarzning so‘ndirilishi avtomatik tarzda sodir bo‘ladi. Kredit kartasi berilganda, qarz oluvchi kreditni so‘ndirishi uchun hisobga kredit shartnomasida belgilangan to‘lov miqdorini o‘z vaqtida kiritishi shart.
Mikroqarzni qanday olish mumkin?
Birinchidan, qulay shartlarda mikroqarzni taqdim etuvchi bank yoki mikrokredit tashkilotini tanlash kerak.
Mikroqarz berish shartlari haqida ma’lumot bilan banklar va mikrokredit tashkilotlarining rasmiy veb-saytlari yoki ularning ofislariga borish orqali tanishib chiqish mumkin.
Kerakli hujjatlar
- mikroqarz olish uchun ariza;
- shaxsni tasdiqlovchi hujjat;
- faoliyat va daromad haqida ma’lumotlarni o‘z ichiga olgan hujjatlar.
Mikroqarz bo‘yicha ta’minot uchinchi shaxs kafilligi, sug‘urta polisi, likvidlikka ega bo‘lgan mol-mulk garovi va boshqalar bo‘lishi mumkin.
Mikroqarz beruvchi tashkilot arizani olgandan so‘ng uch ish kuni ichida uni ko‘rib chiqishi va qaror qabul qilishi shart.
Mikroqarz berish to‘g‘risida ijobiy qaror qabul qilinishiga ijobiy kredit tarixi, doimiy daromad manbaining mavjudligi va kerakli hujjatlarni to‘liq taqdim etish ta’sir qiladi.
Ba’zi banklarning mobil ilovalari masofadan turib mikroqarz olish imkonini beradi.
Avvalroq kredit tarixi nima va u qanchalik muhimligi haqida xabar berilgandi.
Izoh (0)