Markaziy bankning Finlit loyihasi yoshlarning investitsion tadbirkorlik loyihalarini moliyalashtirish uchun taqdim etilayotgan imtiyozli kreditlar haqida ma’lumot berdi.
O‘zbekiston prezidentining qaroriga muvofiq, yoshlar sanoat va tadbirkorlik zonalari hamda Yosh tadbirkorlarni qo‘llab-quvvatlash jamg‘armasi tashkil etiladi.
Ushbu sanoat zonalarida startaplar tashkil etish, yoshlarga tadbirkorlik faoliyatini boshlash va yuritish, shu jumladan, innovatsion mahsulotlarni ishlab chiqarish jarayoniga joriy etish va yirik sanoat korxonalari bilan kooperatsiya aloqalarini o‘rnatish uchun barcha sharoitlar ta’minlanadi.
Sanoat zonalariga, asosan, yosh tadbirkorlarning innovatsion, import o‘rnini bosuvchi va eksportga yo‘naltirilgan mahsulotlar ishlab chiqarishni nazarda tutuvchi hamda patent asosida ishlab chiqarishni yo‘lga qo‘yishni ta’minlovchi startap investitsiya loyihalari joylashtiriladi.
Yaratiladigan yangi ish o‘rinlarining kamida 70 foizi yoshlar uchun mo‘ljallangan, «Yoshlar daftari»ga kiritilgan yoshlarni ish bilan ta’minlash nazarda tutilgan investitsiya loyihalari ustuvorlikka ega bo‘ladi.
Bunday loyihalarni moliyalashtirish uchun imtiyozli kreditlar olish mumkin.
Imtiyozli kreditlar qanday maqsadlar uchun ajratiladi?
Imtiyozli kreditlar yosh tadbirkorlarga barcha yo‘nalishdagi investitsion loyihalar uchun ajratiladi:
- meva-sabzavot va qishloq xo‘jaligi mahsulotlarini chuqur qayta ishlash, saqlash va qadoqlash;
- to‘qimachilik, poyabzal va charm-galantereya;
- kimyo, farmatsevtika;
- oziq-ovqat;
- elektrotexnika sanoati, mashinasozlik, zamonaviy qurilish materiallari;
- hunarmandchilik hamda axborot-kommunikatsiya texnologiyalari.
Yosh tadbirkorlarni qo‘llab-quvvatlash jamg‘armasi mablag‘lari hisobidan ajratiladigan ushbu kreditlar 100 ming AQSH dollarigacha 7 yil muddatga, 7 foiz stavkada (xorijiy valyuta uchun 3 foiz) beriladi.
Agar investitsiya loyihalari qiymati 100 ming AQSH dollari ekvivalentidan oshsa, oshgan qismi uchun ham kredit olish mumkin. Bunda kreditlar tijorat banklari tomonidan umumiy tartibda taqdim etiladi.
Garov
Kredit bo‘yicha quyidagilarni garov ta’minoti sifatida keltirilishi mumkin:
- Tadbirkorlik faoliyatini qo‘llab-quvvatlash davlat jamg‘armasi tomonidan investitsion loyihalar uchun ajratilgan kreditlar bo‘yicha kredit summasining 50 foizigacha, biroq 500 mln so‘mdan oshmagan miqdorda kafillik beriladi;
- Sug‘urta tashkilotlari tomonidan yillik 2 foiz stavkasida kreditni qaytmaslik xataridan sug‘urtalovchi polis taqdim etadi.
Agar kredit oluvchining soliq hamda oldingi tuzilgan kredit shartnomalari bo‘yicha muddati o‘tkazib yuborilgan qarzdorligi mavjud bo‘lsa, kreditlar ta’minoti bo‘yicha kafillik va sug‘urta polisi berilmaydi.
Ushbu holatda, kredit uchun boshqa ta’minot turlarini taqdim etish zarur bo‘ladi.
Yosh tadbirkorlarga o‘z faoliyatini amalga oshirish uchun bino va inshootlardan foydalanish bo‘yicha ham imtiyozlar mavjud.
Bunda bo‘sh bino va inshootlar davlat ko‘chmas mulkidan foydalanganlik uchun belgilanadigan ijara to‘lovining eng kam miqdoridan oshmagan stavkalarida ijaraga beriladi.
Keyinchalik bino yoki inshootlarni o‘z balansida aktiv sifatida ko‘rishni xohlovchi yosh tadbirkorlar lizing asosida binolarni sotib olish imkoniyatiga ega.
Lizing asosida binolar necha foiz asosida taqdim etiladi?
Tijorat banklari tomonidan yosh tadbirkorlik subyektlari binolarni lizing asosida berish milliy valyutada yillik 14 foiz stavkasida amalga oshiriladi. Bunda bino qiymatining 10 foizi tadbirkor tomonidan boshlang‘ich to‘lov sifatida to‘lanadi.
Bundan tashqari, “yoshlar daftari”ga kiritilgan tadbirkorlarga quyidagi imtiyozlar yaratilgan:
- Tadbirkorlik uchun zarur asbob-uskunalar va mehnat qurollarini xarid qilish maqsadida bazaviy hisoblash miqdorining 40 baravarigacha subsidiya ajratiladi;
- Dehqon xo‘jaligi faoliyati bilan shug‘ullanishda urug‘liklar va ko‘chatlarni xarid qilish uchun bazaviy hisoblash miqdorining 8 baravarigacha subsidiya ajratiladi;
- Yosh tadbirkorlar bino va inshootlarni ijaraga olgan bo‘lsa, bir yillik ijara xarajatlarining 30 foizi – biroq ko‘pi bilan 7,35 mln so‘mgacha (BHM ning 25 barobari) kompensatsiya qilinadi.
Avvalroq mikroqarz nima, uni olish tartibi va muddatlari qandayligi haqida xabar berilgandi.
Izoh (0)