Rossiyalik oligarxlarning musodara qilingan yaxtalari auksionga qo‘yila boshlandi

Rossiyalik tadbirkor Dmitriy Pumpyanskiyga tegishli ekani aytilayotgan “Axioma” yaxtasi Gibraltarda kimoshdi savdosiga qo‘yiladi. Bu haqda sud qaroriga tayanib, Business Insider xabar berdi.

Kema mart oyida hududiy hokimiyat qarori bilan musodara qilingan.

Yaxtani sotish to‘g‘risidagi qaror yuqori ekspluatatsiya va texnik xizmat ko‘rsatish xarajatlari bilan bog‘liq bo‘lib, bu yiliga kema qiymatining 10-15 foizini tashkil qilishi mumkin. Nashr yaxtaning narxini 75 million dollarga baholagan.

Gibraltar portida musodara qilingan yaxtaning egasi Ukrainadagi vaziyat fonida Britaniya sanksiyalariga uchragan. Gibraltar Rossiya bilan bog‘liq har qanday kema yoki sanksiyaga uchragan odamlar uchun o‘z hududiga kirishni taqiqlagan.

Mart oyi boshida tadbirkor Aleksey Mordashovning 64 metrli “Lady M” yaxtasi Italiyada musodara qilingan edi. Bundan tashqari, Andrey Melnichenko va Gennadiy Timchenkoning yaxtalari, Alisher Usmonov va Pyotr Avenning ko‘chmas mulki, shuningdek, Davlat dumasi sobiq deputati Oleg Savchenkoning villasi musodara qilingan.

Kreml rossiyalik tadbirkorlarning xorijdagi mol-mulkini musodara qilinishini “banditizm” deb atadi. Rossiya prezidenti matbuot kotibi Dmitriy Peskovning so‘zlariga ko‘ra, bu G‘arbda biznes yuritish xavfli ekanligini ko‘rsatadi.